دوشنبه: د 1398 کال د مرغومي ۲مه

کورنیو چارو وزارت د هغو استوګنیزو ښارګوټو، نانوایانو، حمامونو، د خښتو بټیو، قنادیو، سونا حوضونو، صنعتي کارخانو، دود کوونکو وسایطو، د هوټلونو مالکینو او همدا راز ټولو هغه کابل ښاریانو ته چې تر اوسه یې د خپلو سوداګریزو او غیرسوداګریزو ودانیو د سونګ سیسټم پر منظم او معیاري بڼه نه دی جوړ کړی، خبر ورکول کېږي چې د هوا ککړتیا د راکمولو او مخنیوي په پار دې ژر تر ژره د هوا د ککړوونکو سونګ توکو پر ځای له ګاز او تصفیه شویو سونګ توکو ګټه واخلي.

د افغانستان د جزا کوډ د ۷-۸مو مادو له مخې:

"هغه کس چې په اوبو، خاوره، هوا یا ځمکه کې زیان رسوونکي یا ککړوونکي توکي په هغه اندازه چې د هغوی فزیکي، کېمیاوي یا بیولوژیکي کیفیت په داسې توګه چې انسان یا نورو ژوندیو موجوداتو، بوټو یا ودانیو ته مضر وي، خپاره یا ګډ کړي؛ د چاپېریالي جرم مرتکب کڼل کېږي او په منځني حبس محکومېږي."

کورنیو چارو وزارت د مرغومي میاشتې تر ۸مې نېټې ذکر شویو اصنافو ته فرصت ورکوي؛ ترڅو د غیرمعیاري او ناتصفیه شویو سونګ توکو له کارولو ډډه وکړي.