د دعوت او ارشاد ریاست له لوري د اخیستل شوې ازموینې پایلې د یوې پرتمینې غونډې په ترڅ کې اعلان شوې

۱۴۴۶کال د جمادي الثاني ۱۶مه/کابل
د ا.ا.ا د مشرتابه حکم په اساس د ټولو امارتي ادارو کارکوونکو ته د اهمو او ضروري دیني مسایلو په هکله د دعوت او ارشاد ریاست مسوولینو لخوا درس ورکول کیږي چې د یاد درس د اغېزمنتیا معلومولو او ارزونې په موخه د چاپېریال ساتنې ملي ادارې د دعوت او ارشاد رياست له لوري د اخیستل شوې ازموینې پایلې د یوې لویې غونډې په ترڅ کې اعلان شوې.
دا غونډه نن چهارشنبه د ۱۴۰۳کال د لیندۍ په ۲۸مه نېټه د دې ادارې د کول حشمت خان غونډو په تالار کې جوړه شوې وه چې پکې د چاپېریال ساتنې ملي ادارې رهبرۍ، د دعوت او ارشاد عمومي رئیس مولوي شریف الله حقاني، علمای کرامو، د دې ادارې مسوولینو او کارکوونکو ګډون کړی وو.
د چاپېریال ساتنې ملي ادارې عمومي رئیس مولوي مطیع الحق خالص دعوت او ارشاد د اسلامي ټولنو اساسي مسوولیتونو څخه یو مسوولیت وباله او دا یې د هر مسلمان وظیفه وبلله او ویې ویل چې هیڅوک ترې ځان مبرأ نشي ګڼلی.

نوموړي وویل: دا د هر مسلمان وظیفه ده چې دیني معلومات زده کړي او تر نورو یې ورسوي؛ د دیني فرایضو، واجباتو او سننو الزامیت یوازې تر ماموریته پورې مستلزم نه دی؛ بلکې د ژوند په ټولو اړخونو کې باید دین خپله تګلاره وګرځوو او په خپل ژوندانه کې یې عملي کړو.
ښاغلي خالص سپارښتنه وکړه چې موږ باید دیني مسایل زده کړو، په خپل ورځني ژوند کې یې عملي کړو او مثبت تغیر پکې راولو او همدا راز خپلې دندې په پوره اخلاص او امانت دارۍ ترسره کړو.

د غونډې په لړ کې د دعوت او ارشاد عمومي رئیس مولوي شریف الله حقاني، د چاپېریال ساتنې ملي ادارې د دعوت او ارشاد رئیس مولوي هدایت الله فتاحي او د کلیو پراختیا او بیارغاونې وزارت د ارشاد او دعوت رئیس مفتي احسان الله ابوالفیضان د تعلیم او تعلم د ارزښت په هکله هر اړخیزې ویناوې وکړې

او په امارتي ادارو کې یې د اسلامي امارت کارکوونکو ته د ديني تدریس زمینه مساعدول د امیرالمؤمنین حفظ الله تعالی ځانګړی شفقت او پېرزوینه وبلله او سپارښتنه یې وکړه چې ټول کارمندان باید له دې فرصت څخه اعظمي ګټه پورته کړي.

همدا راز د غونډې ګډونوالو ته د خوږ ژبو نعت‌خوانانو له لوري نعتیه کلام واورول شول؛ پر ممتازو کارکوونکو ډالۍ وویشل شوې او غونډه د دعایې په لوستلو پای ته ورسیده.