د افغانستان د چاپېريالي وضعيت د ارزونې راپور جوړولو په تړاو افتتاحیه غونډه ترسره شوه

۱۴۴۶ کال د ذوالحجې ۵مه/ کابل
د چاپېریال ساتنې ملي ادارې له لوري  درها مؤسسې په همکارۍ نن دوشنبه د ۱۴۰۴کال د جوزا په ۱۲مه نېټه کابل سټار هوټل کې د افغانستان د چاپېريالي وضعيت د ارزونې دوه ورځنۍ افتتاحیه غونډه ترسره شوه چې پکې د دې ادارې عمومي رئیس مولوي مطيع الحق خالص، د بېلابېلو امارتي ادارو مسوولینو او استازو، ملي او نړۍوالو مؤسسو استازو، د پوهنتونونو استادانو، متخصصينو او رسنیو استازو ګډون کړی وو.

غونډه د قرانکريم مبارکو اياتونو په تلاوت پيل شوه ورپسې د پياوړتيا لوړولو، چاپېريال او بشري مرستو(رها) مؤسسې رئیس محمد يوسف حميديان ګډونوالو ته ښه راغلاست ووايه او د رها مؤسسې د فعاليتونو په هکله يې وينا وکړه.
د چاپېریال ساتنې ملي ادارې عمومي رئیس مولوي مطيع الحق خالص د افغانستان د چاپېريالي وضعيت په تړاو هر اړخيزه وينا وکړه او زياته يي کړه: چاپېريال د طبیعت، شريعت او صحت له اړخه ډير ارزښت لري؛ ځکه د يوه سالم ژوندانه لپاره چاپېريال اساس دی.
ده وويل: افغانستان کې د څو لسیزو جګړو او ناامنیو له امله ډير ځنګلونه له منځه تللي، وحشي ژوي په ډيرې بې رحمۍ سره ښکار شوي دي، د ښکيلاک ګرو لخوا ډول ډول خطرناکې وسلې کارول شوې دي، حتی د بمونو مور هم وکارول شوه چې ناوړه اغېزو سره يې زموږ ملت اوس لاس او ګریوان دی او د افغانستان چاپېريالي وضعيت خورا له بد حالت سره مخ دی.

د هوا او اوبو ککړتيا هم هغه جدي ستونزې دي چې زمونږ هېوادوال یې ګالي.
ښاغلي خالص وويل: د ژمي په موسم کې د لويو ښارونو د هوا ککړتيا کچه لوړيږي چې زموږ هېوادوال يې له ډيرو چاپېريالي ستونزو او ډول ډول ناروغيو سره مخ کړي دي او دا زموږ ټولو مسؤليت دی چې د دې ستونزو د حل لپاره هلې ځلې وکړو.
د چاپېریال ساتنې ملي ادارې عمومي رئیس وویل: نړۍوال بايد خپل سياستونه په دولتونو پورې و نه تړي، بلکې افغانستان دې د نړۍ برخه وګڼي او له افغانستان سره دې امتيازي سلوک نه کوي.

ښاغلي خالص ټينګار وکړ چې نړۍوال دې چاپېريالي او د اقلیمي بدلون موضوعات نه سیاسي کوي، له ملتونو سره دې ظلم نه کوي او د افغانانو حقوق دې ورکړي.
ده همدا راز د رها مؤسسې له مسوولینو وغوښتل چې د افغانستان د چاپېريالي وضعيت ارزونه دې نه محدوده وي، ټول قشرونه او ټولې خواوې دې پکې راونغاړي او د عصري ميتودونو په پام کې نيولو سره دې د افغانستان د چاپېريالي وضعيت د ارزونې په تړاو يو ټول‌منلی او جامع راپور چمتو کړي.

نوموړي له ملي او نړيوالو مؤسسو څخه وغوښتل چې نمايشي کارونه دې پرېږدي، خپلې پروژې دې لومړيتوبونو ته په کتو سره تطبیق کړي.
د غونډې په لړ کې د رها مؤسسې مرستيال انجنير عزت الله صديقي له‌لوري د افغانستان د چاپېريالي وضعيت د راپور جوړونې د څرنګوالي، اهميت او ضرورت په تړاو هر اړخيز معلوماتي پرزنټيشن وړاندې کړ او ژمنه يې وکړه چې د افغانستان د چاپېريالي وضعيت په تړاو به د اړوندو ادارو او ښکېلو خواوو په همکارۍ يو معياري او منل شوی راپور جوړ کړي.
د غونډې په لړ کې د متخصصینو لخوا ګډونوالو ته هر اړخيز معلوماتي پرزنټيشنونه وړاندې شول، ګډونوالو خپل نظرونه او وړانديزونه واورول او د اړوندې موضوع په هکله ګروپي کارونه وشول.

د يادونې وړ ده چې د افغانستان د چاپېريالي وضعيت د ارزونې په تړاو به د چاپېریال ساتنې ملي ادارې او رها مؤسسې له‌لوري د ښکېلو خواو په همکارۍ د شپږو مياشتو په ترڅ کې د افغانستان د چاپېريالي وضعيت د ارزونې راپور چمتو او عملي کیدو ته وړاندې شي.