وروستی
د کابل ښار د هوا ککړتیا د راکمولو او مخنیوي په تړاو د چاپیریال ساتنې ملي ادارې مشرتابه له کابل والي سره ناسته وکړه
د چاپېریال ساتنې ملي ادارې عمومي رئیس شاه زمان میوندي او مسلکي معین انجنیر عزت الله صدیقي د زمري په ۴مه نېټه د کابل له والي محمد یعقوب حیدري سره د ولایت په مقام کې وکتل.
په دې غونډه کې د چاپېریال ساتنې ملي ادارې مشرتابه د ژمي په موسم کې په کابل ښار کې د هوا ککړتیا راکمولو او مخنیوي په پار له کابل والي سره د دې ادارې پلان شریک کړ او دواړو خواوو په ژمي کې د هوا ککړتیا راکمولو او مخنیوي لپاره د ګډو تدابیرو او همغږۍ په پراخېدو هر اړخیز بحث وکړ.
ښاغلي میوندي د کابل ښار د هوا ککړتیا لاملونو ته اشاره وکړه او د ریګرېشنونو د فعالیت، ښاري ټرانسپورټ، د تخنیکي ازموینې د مرکزونو جوړېدو، د ښارګوټو، لوړپوړیزو ودانیو او تصدیو په سونګ سیسټم کې له ډبرو سکرو څخه استفادې، په دوامداره توګه د تصديو د فعالیتونو څارنه او په ښارونو کې د ټرافیکي ګڼې ګوڼې د راکمولو د حل لارو چارو په هکله معلومات وړاندې کړل.
همدا راز ښاغلي صدیقي د هوا ککړتیا د لاملونو په تخنیکي اړخ رڼا واچوله، د خلکو په روغتیا باندې یې د منفي اغېزو او د ژمي تر رارسیدو دمخه د دې ادارې له خوا د تدابیرو نیولو په تړاو هر اړخیز معلومات وړاندې کړل.
د کابل والي ښاغلي حیدري د چاپېریال ساتنې ملي ادارې له طرحې ملاتړ وکړ او ویې ویل: موږ هم د هوا ککړتیا د راکمولو او مخنیوي په تړاو پر یوه طرحه کار کوو، کله چې بشپړه شوه د چاپېریال ساتنې ملي ادارې سره به یې شریکه کړو.
د کابل والي چې د کورونا ویروس د مخنیوي د بېړنۍ کمیټې مشري هم کوي، ژمنه وکړه چې د چاپیریال ساتنې ملي ادارې پلان به له نومړې کمېټې سره شریکوي.
دواړو لوریو ژمنه وکړه چې د ګډو پلانونو د پلي کېدو په موخه به له یو بل سره همکاري کوي.