وروستی
د افغانستان اسلامي امارت د چاپېریال ساتنې ادارې عمومي رئیس او ورسره پلاوي په آذربایجان کې د WUF13 نړیوال ښاري فورم کې ګډون وکړ
١٤٤٧ کال د ذوالحجې ١/ باکو،
آذربایجان
د افغانستان اسلامي امارت د چاپېریال ساتنې ادارې عمومي رئیس
الحاج مولوي مطیعالحق خالص د یوه پلاوي په مشرۍ د آذربایجان هېواد پلازمېنې باکو ښار
ته د سفر په ترڅ کې د ملګرو ملتونو د بشري مېشت ځایونو ادارې (UN-Habitat) له لوري
جوړ شوي په نړیوال ښاري فورم (WUF13) کې ګډون وکړ.
یاد نړیوال فورم چې د نړۍ له سترو نړیوالو غونډو څخه شمېرل
کېږي، سږکال د “Housing the
World: Safe and Resilient Cities and Communities” تر سرلیک لاندې د ۲۰۲۶م کال د مې له ۱۷مې څخه تر ۲۲مې نېټې
پورې د آذربایجان په کوربتوب د باکو په المپیک لوبغالي کې ترسره کېږي.
دغه فورم د ملګرو ملتونو د بشري مېشت ځایونو ادارې (UN-Habitat) او د آذربایجان دولت له لوري په ګډه تنظیم شوی، چې پکې د نړۍ
د بېلابېلو هېوادونو ولسمشران، وزیران، د ښار جوړونې او چاپېریالي برخو متخصصین، نړیوال
مالي بنسټونه، مرستندویه ادارې او د ښاري پراختیا اړوند زرګونه استازي ګډون لري.
د یاد فورم رسمي پرانیستنه د آذربایجان جمهور رئیس الهام علیاف
له لوري ترسره شوه. نوموړي په خپله وینا کې د دوامدارو او خوندي ښارونو پر جوړولو،
د اقلیمي بدلون پر وړاندې د ګډې مبارزې، د ښاري خدماتو پر پیاوړتیا او د نړیوالو
همکاریو پر ارزښت ټینګار وکړ.
هغه وویل چې د WUF13 کوربتوب د نړیوالو ښاري او چاپېریالي موضوعاتو په برخه کې د
آذربایجان د فعال رول او نړیوال باور څرګندونه کوي.
د آذربایجان د ولسمشر تر وینا وروسته د ملګرو ملتونو عمومي
سرمنشي انتونیو ګوتېرېش د انلاین وینا له لارې د نړۍ له هېوادونو وغوښتل چې د اقلیمي
بدلون، بېنظمې ښاري پراختیا او چاپېریالي ستونزو پر وړاندې ګډ او عملي اقدامات وکړي.
نوموړي د ښارونو دوامداره وده د بشر د راتلونکې لپاره مهمه وبلله او د نړیوالو
همکاریو پر پراختیا یې ټینګار وکړ.
همداراز د ملګرو ملتونو د عمومي اسمبلۍ رئیسې انالینا بایربوک
او د UN-Habitat عمومي مشر هم د انلاین ویناوو له لارې د ښاري پراختیا، چاپېریال
ساتنې، د اقلیم بدلون پر وړاندې د مقاومت لرونکو ښارونو جوړولو او د بشري مېشت ځایونو
د وضعیت د ښه والي په اړه مهمې څرګندونې وکړې.
په دې نړیوال فورم کې د ګڼو هېوادونو لوړپوړو چارواکو، وزیرانو،
ښاروالانو او د نړیوالو سازمانونو استازو ګډون کړی، چې د نړۍ د ښارونو د راتلونکې،
اقلیمي بدلون، خوندي استوګنځایونو، زرغونو ښارونو، عصري ښاري سیستمونو او د بشري مېشت
ځایونو د وضعیت د ښه والي په اړه مهم بحثونه او نظریات شریکوي.
په دې فورم کې د نړۍ له ۱۸۰ څخه د ډېرو هېوادونو څه باندې
۳۲ زره ګډونوالو نوملیکنه کړې، چې دا د نړیوال ښاري فورم (WUF) د تاریخ له سترو او
مهمو نړیوالو غونډو څخه بلل کېږي.
د افغانستان اسلامي امارت د چاپېریال ساتنې ادارې پلاوی به
د فورم په بېلابېلو تخنیکي او تخصصي غونډو کې د افغانستان د چاپېریالي وضعیت، د
اقلیمي بدلون له امله د رامنځته شویو ستونزو، وچکالۍ، د هوا ککړتیا، د ښاري چاپېریال
ننګونو او د دوامدارو ښارونو د رامنځته کولو د اړتیاوو په اړه د افغانستان لیدلوری
او اړتیاوې له نړیوالو استازو او ادارو سره شریکې کړي.
همداراز د دې فورم په څنډه کې به د نړیوالو سازمانونو،
مرستندویه بنسټونو او د بېلابېلو هېوادونو له استازو سره د اړیکو پراختیا، د تجربو
شریکولو او د چاپېریال ساتنې، ښاري پراختیا او اقلیمي بدلون اړوند د ګډو همکاریو د
جلبولو په موخه یو شمېر لیدنې او بحثونه هم ترسره شي.
د یادونې وړ ده چې نړیوال ښاري فورم (WUF) په ۲۰۰۱م کال کې د
ملګرو ملتونو له لوري رامنځته شوی او دا مهال د ښاري پراختیا، چاپېریال ساتنې، اقلیمي
بدلون، د ښارونو مدیریت او دوامدارې ښاري ودې په برخه کې د نړۍ تر ټولو مهم نړیوال
پلیټفارم ګڼل کېږي، چې د هېوادونو ترمنځ د تجربو تبادلې، نړیوالو همکاریو او ګډو
حللارو موندلو لپاره ځانګړی اهمیت لري.