د طبي زبالو او کثافاتو د تنظیم؛ ځنګلونو او اوبو د ساتنې په پار نظارت ترسره شو

۱۴۴۷ کال د ذوالحجې ۴نېټه/کابل-ننګرهار-غزنی-خوست

د طبي زبالو او کثافاتو د تنظیم؛ شنو ساحو، ځنګلونو او اوبو د ساتنې په موخه د کابل، ننګرهار، غزني او خوست ولایتونو د چاپېریال ساتنې ریاستونو نظارتي ټیمونو له لوري مختلف فعالیتونه ترسره شوي دي.

د کابل او غزني ولایتونو د چاپېریالي چارو مفتشینو له لوري د طبي زبالو او کثافاتو د تنظیم او مدیریت په پار د ۱۴بېلابیلو اصنافو (روغتونونو، کلینیکونو، لابراتوارونو، هوټلونو، نانوایانو او قصابیو) د فعالیتونو د څرنګوالي څارنه او ارزونه وشوه.

د یادو صنفونو ټولو مسؤلینو ته اړینې چاپېریالي سپارښتنې وشوې چې پکې د طبي زبالو او کثافاتو مدیریت، لوګي د تصفیې فلټر فعال ساتل، د شنو ساحو رامنځته کول، د فاضلابو لپاره د سپټیک څاه سیستم جوړول، د اوبو په مصرف کې سپما ، او د چاپېریالي جوازونو اخیستل او تمدید شامل وو.

د ننګرهار ولایت د چاپېریال ساتنې ریاست د فعالیتونو د ارزونې ټیم له لوري د جلال‌اباد ښار شپږمې ناحیې اړوند خالص فامیليو کې د معدني اوبو تولیدي فابریکې څخه د چاپېریالي وضعیت د ارزونې په موخه لیدنه ترسره شوه.