وروستی
د چاپېریال ساتنې ملي ادارې د عادي او پراختیایي بودجې په مصرف کې پر روڼتیا او موثریت ټینګار
کابل ۱۳۹۹،د زمري ۲۶ مه
د چاپېریال ساتنې ملي ادارې د ۱۴۰۰ کال پروژو د ارزونې ناسته، د ۱۳۹۹یم کال د زمري پر ۲۵مه د دې ادارې د مالي او ادارې معین محمد یوسف حمیدیان په مشرۍ تر سره شوه.
په دې ناسته کې چې د مرکزي ادارې رییسانو شتون درلود، د عادي او پراختیایي بودجې د مصرفولو راپور په اړه خبرې اترې وکړې. په پیل کې د دې ادارې مالي او حسابي رییس عبدالنصیر رحیمي خبرې وکړې او د ۱۳۹۹یم کال د مصرف شوې عادي او پراختیایي بودجې راپور یې وړاندې کړ.
ښاغلي رحیمي وویل، چې د کرونا وایروس د خپرېدو په وجه ځینې پروژې د مالي پلان اړوند نه دي تر سره شوې او دغې موضوع د بودجې د لګولو په برخه کې منفي تاثیرات رامنځته کړي دي.
د ناستې په اوږدو کې دچاپېریال ساتنې ملي ادارې مالي او اداري معین محمد یوسف حمیدیان له ټولو ریاستونو وغوښتل چې د ټولو پراختیایي او عادي پروژو د مصارفو د روڼتیا په برخه او د مالي منابعو د پر وخت اجراآتو مدیریت په لاس کې واخلي.
وروسته د ۱۴۰۰کال لپاره د پیش بیني شویو پروژو په اړه نظریات وړاندې شول او پرېکړه وشوه چې د نوي کال د بودجې د دفاع لپاره لازم اسناد چمتو کړل شي. د دې ادارې مالي او اداري معین ټولو ریاستونو ته هدایت ورکړ، چې د ۱۴۰۰کال د پروژو لپاره روڼتیا او موثریت په نظر کې ونیسي، اساسي تمرکز د چاپېریالي چالشونو د مدیریت او د هېواد د منابعو او طبعي ارزښتونو د ښې ساتنې په برخه کې ولري.
ده ټینګار وکړ چې خلکو ته د ځواب ویلو په برخه کې روڼتیا او اغېزمنتیا له ټولو پروژو لومړیتوب لري او ټولې څانګې مکلفې دي، چې د افغانستا اسلامي جمهوري دولت د ملي موخو اړوند د چاپېریال ساتنې د امر مطابق خپلې برنامې تنظیم کړي.