وروستی
د طبي زبالو د تنظیم کمېټې غونډه وکړه
د وږي ۱نېټه/ کابل
د چاپېریال ساتنې ملي ادارې مسلکي معین انجنیر عزت الله صدیقي په مشرۍ د طبي زبالو د تنظیم کمېټې د دې ادارې د بند امیر د غونډو په تالار کې لومړنۍ ناسته وکړه چې پکې د دې کمېټې غړیو، د عامې روغتیا وزارت، د روغتونونو انجمن او اړوندو دولتي ادارو استازو ګډون کړی وو.
په پیل ښاغلي صدیقي ګډونوالو ته ښه راغلاست ووایه او زیاته یې کړه: د کورونا وبا پر مهال د چاپېریال ساتنې ملي ادارې د هېوادوالو د روغتیا ساتنې په موخه د خطرناکو طبي پاتې شونو د سوزولو لپاره طرزالعمل جوړ کړی چې ټولې طبي زبالې باید د هغه د لارښوونو مطابق وسوځول شي. نوموړي وویل طبي زبالې د چاپېریال لپاره خطرناکې دي او له ښارونو څخه باید لېرې باید وسوزل/ له منځه یوړل شي.
د غونډې په لړ کې د دې ادارې د چاپېریالي چارو د څارنې رئیس انجنیر نیک محمد د ولایتي کمېټو د فعالیتونو راپور وړاندې کړ او ویې ویل چې د طبي زبالو د تنظیم کمېټې پرېکړه کړې چې په مرکز او ولایتونو کې باید طبي زبالې له ښار څخه لېرې په انسنراټورونو کې وسوځول شي؛ همدا راز پرېکړه شوې چې ټول خصوصي روغتونونه باید د خپلو کلینیکې پاتې شونو لپاره انسنراټورونه وپېري او یا یې هم د دولتي روغتونونو په انسنراټورونو کې وسوځوي.
د کمېټې غړیو ټینګار وکړ چې د طبي زبالو د له منځه وړلو لپاره باید دولت له ښارونو څخه لېرې ځمکه ورکړي؛ ترڅو د طبي زبالو د سوزولو ماشینونه او خصوصي شرکتونه هلته ولېږدول شي.
د غونډې په پای کې لاندې پرېکړې وشوې:
• د طبي زبالو کمېټې غړي باید د دولتي او خصوصي روغتونو له طبي زبالو او د هغو د له منځه وړلو له ځایونو څخه لیدنه وکړي.
• د طبي زبالو د له منځه وړلو لپاره چې کومه ځمکه ځانګړې شوې، موضوع یې باید ژر ژره د کمېټې له ادرسه حل شي.
• او د طبي زبالو د سوزولو د څرنګوالي لپاره باید نوی طرزالعمل جوړ شي.