وروستی
د هوا ککړتیا راکمولو او مخنیوي په پار تخنیکي بحث ترسره شو
د وږي ۲۰مه/ کابل
د کنفرانس دویمه برخه:
د پاکې هوا نړۍوالې ورځې لمانځلو مطبوعاتي کنفرانس په تعقیب، د چاپېریال ساتنې ملي ادارې مسلکي معین انجنیر عزت الله صديقي، مېرمن فوزیې کوفي، د کلیو بیارغونې او پراختیا وزارت سلاکارې انجنیر ناجیې خروټې او د دې ادارې د حقوقي چارو سلاکار نعمت الله سلطاني د کنفرانس په دویمه برخه د چاپېریالي موضوعاتو او په ځانکړې توګه د هوا ککړتیا په تړاو هېوادوالو ته معلومات ورکړل.
په پیل کې د چاپېریال ساتنې ملي ادارې مسلکي معین انجنیر عزت الله صدیقي د کابل ښار د هوا د څرنګوالي په اړه معلومات ورکړل او زیاته یې کړه: زموږ د سیسټم د معلوماتو له مخې د قرنتین په ورځو کې د کابل ښار هوا د ستنډرډ له حالت څخه هم ډېره پاکه وه یعنې کاملا هوا پاکه وه مګر له قرنتین وروسته په تدریجي ډول هوا ککړه شوه.
ښاغلي صديقي وویل: موږ د هوا ککړتیا د راکمولو او مخنیوي لپاره جدي پلانونه او تدابیر لرو؛ خو په پلي کېدو کې یې د اړوندو ادارو همکاري خورا اړینه ده. ده خبرداری ورکړ که د هوا ککړتیا د تېر ژمي په څېر زیاته او د کورونا ویروس له دویم پړاو سره یوځای شي؛ نو وضعیت به ډیر خراب شي، له همدې امله اړینه ده چې اړوندې ادارې، خصوصي سکټور، رسنۍ، علمای کرام، د مدني ټولنې غړي او ټول هېوادوال د هوا له ککړتیا سره جدي مبارزه وکړي.
آغلې فوزیې کوفي په چاپیریال ساتنه کې د هر شخص پر مسؤلیت ټینګار وکړ او زیاته یې کړه: د پاکې هوا درلودو لپاره باید موږ ټول له چاپېریال سره مناسب چلند وکړو او له تخریب څخه یې ډډه وکړو.
د کلیو بیارغونې او پراختیا وزارت سلاکارې انجنیر ناجيې خروټې هم د چاپیریال ساتنې په برخه کې د دغه وزارت د کړنو او لاسته راوړنو په اړه خبرې وکړې او ویې ویل د هوا ککړتیا د را کمولو او مخنیوي لپاره د شنو ساحو پراختیا او د نیالګیو کېښودل، ساتنه او پالنه اړینه ده.
د چاپېریال ساتنې ملي ادارې حقوقي سلاکار نعمت الله سلطاني د دې ادارې د تقنیني سندونو په اړه خبرې وکړې او ویې ویل: د جزا په کوډ کې د چاپیریالي جرمونو شاملول، په چاپیریال قانون کې د اقلیمي بدلون موضوع اوډل د پلاستیکونو او ربړونو پر سوځېدو بندیز لګول هغه اړین تعدیلات دي چې د هوا ککړتیا د را کمولو او مخنیوي په موخه په تقنیني سندونو کې شامل شوي دي. ده وویل: موږ د هوا ککړتیا د راکمولو او مخنیوي په پار له امنیتې، عدلي او قضایي ارګانونو سره همغږي کړې چې په لومړي پړاو کې به د اصنافو، ښارګوټو، لوړپوړیزو ودانیو، د خښتو بټیو او ګچ پزیو مالکینو ته توصیه بیا اخطاریه او په وروستي پړاو کې به سرغړوونکي عدلي او قضایي ارګانونو ته ور معرفي کوو.
کنفرانس د ګډونواله د پوښتنو په ځوابولو سره پای ته ورسېده.