وروستی
د چاپېریال ساتنې ملي ادارې مشرتابه د کندهار د مدني ټولنې غړو او خبریالانو سره ګډه ناسته وکړه
د وږي ۲۴مه نېټه/کندهار
د چاپېریال ساتنې ملي ادارې عمومي رئیس شاه زمان میوندي کندهار ته د خپل رسمي سفر په لړ کې د مدني ټولنو له غړو، د رسنیو له مسولینو او خبریالانو سره ولیدل.
د دې سفر موخه، چې پکې د یادې ادارې یو شمېر رئیسان هم ګډون لري، د کندهار ولایت د چاپېریالي وضعیت ارزول، د چاپېریالي ګواښونو په تړاو هر اړخیز بحثونه او د عامه پوهاوي لوړولو په برخه کې د مدني ټولنو او خبریالانو ونډه اخیستل دي.
د رسنیو مسولینو او د مدني ټولنو غړو دغه ولایت ته د چاپیریال ساتنې ملي ادارې د مشرتابه پلاوي د ورتګ له امله هرکلی وکړ او غوښتنه یې ترې وکړه چې د کندهار ولایت چاپېریالي ستونزو ته پاملرنه وکړي لکه: د هوا ککړتیا، ناقاونه ښکار، د چاپېریالي ګواښونو راکمول او له اړوندو ادارو سره د قوي همهغږۍ په برخه کې دې لا زیات کار وشي.
ورپسې د چاپېریال ساتنې ملي ادارې عمومي رئیس د خپل سفر موخه له دولتي مسوولینو، خلکو او ځوانانو سره د چاپېریالي ستونزو د حل په موخه خبرې اترې کول وبلل او زیاته یې کړه: له هوا ککړتیا سره مبارزه، له اقلیمي بدلون سره سازښت او د چاپېریالي ګواښونو راکمول د دې ادارې کاري لومړیتوبونو وګڼل او ویې ویل چې د یادو ستونزو د حل لپاره به جدي پاملرنه کوي.
ښاغلي میوندي د دغه ولایت د چاپېریال ساتنې رئیس ته دنده وسپارله؛ تر څو د همغږۍ د پراختیا په برخه کې له خبریالانو او مدني ټولنې سره دوامداره اړیکې وساتي.
د ناستې په اوږدو کې د چاپېریال ساتنې ملي ادارې عمومي رئیس له خوا د خبریالانو او مدني ټولنو غړو پوښتنو ته ځوابونه ورکړل شول او د خلکو او مدني ټولنو پر ګډه همکارۍ یې ټینګار وکړ.
د ناستې په پای کې ښاغلي میوندي او ورسره پلاوي یې د کندهار ولایت له موزیم او نندارتون څخه لیدنه وکړه.