وروستی
د چاپېریالي قوانیونو او جزا کوډ په هکله، د مختلفو ارګانونو ۵۰ غړو ته دوه ورځنی سیمینار ترسره شو
د تلې۷مه/ نورستان پارون
د چاپېریال ساتنې ملي ادارې د اطلاعاتو او عامه اړیکو ریاست د عامه پوهاوي ټیم له خوا، د نورستان ولایت د چاپېریال ساتنې ریاست په همکارۍ د چاپېریالي جرمونو د جزا کوډ، ځنګلونو، اقليمي بدلون اثراتو او چاپېریال ساتنې پر وړنداې د عامه مسوولیت په تړاو دوه ورځنی سیمینار ترسره کړ.
په یاد سمینار کې د یاد ولایت د مقام معاون محمد هاشم فیضي، د نوموړي ولایت د اطلاعاتو کلتور ریاست رییس فضل الحق خالقیار، د ښار جوړونې رییس انجنیر محمد سلیم صافي د اړوندو دولتي ادارو استازو، مدني فعالانو، علمای کرامو او ځوانانو ګډون کړی وو.
د سیمینار په پیل کې د نورستان ولایت د چاپېریال ساتنې ریاست په استازیتوب الحاج سرتاج الدین صافي ګډونوالو ته ښه راغلاست ووایه او د چاپېریالي مسایلو په هکله یې وینا وکړه، ده له خلکو و غوښتل چې د چاپېریال ساتنې په په برخه کې ورسره تلپاتې همکاري وکړي او تر څنګ د نورستان ولایت د ځنګلونو، وحشي ژویو، ژوند بڼو او طبعي سرچینو په ساتنه کې هر اړخیزه مرستې وکړي.
د سیمینار په اوږدو کې د عامه پوهاوي غړو، ګډونوالو ته د چاپېریالي جرمونو د جزاکوډ، ځنګلونو او اقلیمي بدلون اثراتو په تړاو بېلابېل معلوماتي پریزینټېشنونه وړاندې کړل او د ملي پارک د ګټو او ارزښتونو په تړاو یې ورسره معلومات شریک کړل.
ورپسې د یاد سمینار ګډونوالو د چاپریالي مسایلو په تړاو خپل وړاندیزونه او نظرونه شریک کړل، د داسې سیمینارونو جوړول یې اړین او ګټور وبلل او په دې برخه کې یې د هر اړخیزې همکارۍ ژمنه وکړه.
هېره دې نه وي چې د دغه دوه ورځني سمینار په پای کې د یاد ولایت معاون، د اطلاعاتو کلتور ریاست رییس ګډونوالو ته د چاپېریال ساتنې پر ارزښت، ګټو او نورو اړوندو موضوعاتو هر اړخېزې خبرې وکړې او د سمینار د ګډونوالو د ستاینلیکونو په ورکړه کې یې همکاري وکړه.