وروستی
په اسلامي مهنډسۍ کې د انرژۍ خوندي کولو په تړاو سمینار تر سره شو
کابل: ۱۳۹۹د وږي ۱۵مه
د چاپېریال ساتنې ملي ادارې د کول حشمت خان غونډو په تالار کې د مشکات نور موسسې له خوا (په اسلامي مهنډسۍ کې د انرژۍ خوندي کولو) سمینار تر سره شو، په دغه سمینار کې د چاپېریال ساتنې ملي ادارې مسلکي معین انجنیر عزت الله صدیقي، د یادې ادارې کارکوونکو، مدني ټولنو غړو او کابل ښاروالۍ کارکوونکو ګډون کړی و.
په پیل کې د چاپېریال ساتنې ملي ادارې د اطلاعاتو او عامه اړیکو رییس قاسم رحیمي ګډونوالو ته د ښه راغلاست تر څنګ په چاپېریالی موضوعاتو خبرې وکړې او د خلکو، مدني ټولنو او دولت تر منځ یې پر اړیکو جوړولو تاکید وکړ. ښاغلي رحیمي د چاپېریالي ګواښونو له جملې، د هوا ککړتیا یادونه وکړه زیاته یې کړه، چاپېریال ساتنه د ټولو څانګو سره تړاو لري؛ تر څو د ښار جوړونې په برخه کې انجنیري او چاپېریالي معیارونو ته لومړیتوب ورکړل شي.
ورپسې د کابل ښاروالۍ د چاپېریالي روغتیا رییس حسن غلامي پر چاپېریالي موضوعاتو خبرې وکړې. ده د چاپېریال ساتنې په برخه کې د هوا ککړتیا لوی ګواښ و باله او د دغې ستونزې د حل لپاره یې د لمریزې برېښنا په اړه، چې لمریزه برېښنا باید په کور د ننه کې زخیره شي معلومات وړاندې کړل، ده زیاته کړه چې دغه کړنه د هوا ککړتیا د مخنیوي په برخه کې فوق العاده اغېزناکه تمامېدلی شي.
د یاد سمینار په پای کې د چاپېریال ساتنې ملي ادارې مسلکي معین انجنیر عزت الله صدیقي یاد سمینار د چاپېریال ساتنې په برخه کې اغېزناک و باله او په دغه سمینار کې یې د انرژۍ، اسلامي مهنډسۍ او هنري ارزښتونو ستاینه وکړه. همدا راز ښاغلي صدیقي زیاته کړه چې له دې ډول برنامو څخه جوتېږي چې د چاپېریال ساتنې په برخه کې عامه پوهاوی او ظرفیت لوړنه تر لوړې کچې رسېدلی؛ خو لاهم باید د عامه پوهاوي او ظرفیت لوړنې په برخه کې کار وشي.
ښاغلي صدیقي یاده برنامه ښه و ارزوله او ویې غوښتل چې په دې تړاو دې، دې ته ورته برنامې زیاتې شي، مدني ټولنو ته د چاپېریال ساتنې په برخه کې فرصتونه چمتو شي، تر څو ټول هېواد وال د یوه خوندي او پاک چاپېریال درلودونکي و اوسي. نوموړي له ټولو هېوادوالو، علمي بنسټونو، خصوصي سکتور او د افغانستان د انجنیري زده کړو له لارویانو غوښتنه وکړه، چې د چاپېریالي ګواښونو د مدیریت په برخه کې هر اړخیزه همکاري وکړي؛ تر څو په راتلونکې کې د ښار جوړونې په برخه کې، هېواد له هر ډول ګواښونو خوندي پاتې شي.