وروستی
د کیمیاوي توکو او خطرناکو زبالو شرکتونو د اتحادیې د جوړېدو په پار مشورتي غونډه وشوه
د لړم ۱۴مه کابل
د چاپېریال ساتنې ملي ادارې د ملګرو ملتونو د چاپېریال پرګرام UNEP په همکارۍ د کیمیاوي توکو او خطرناکو زبالو شرکتونو د اتحادیې جوړېدو په پار چې موخه یې د کیمیاوي موادو او خطرناکو زبالو مديریت، تنظیم او د شرکتونو منسجم کول وو، مشورتي غونډه وکړه چې پکې د اړوندو دولتي ادارو او د کیمیاوي موادو او خطرناکو زبالو شرکتونو استازو او د دې ادارې کارکوونکو ګډون کړی وو.
په پیل کې د دې ادارې د تلپاتې چاپېريالي پراختیا د ارزونې رئیس انجنیر نقیب الله صدیقي د کیمیاوي موادو او خطرناکو زبالو موضوع اړینه وبلله او و يې ويل: په دې برخه کې د چاپېریال ساتنې ملي ادارې د اړتیا تر کچې کار کړی او لا هم هلې ځلې کوي؛ تر څو شته ستونزې حل او مخه یې ونیسي. نوموړي په دې برخه کې د خصوصي سکتور ونډه اړینه وبلله او د همکارۍ غوښتنه یې ترې وکړه.
د ناستې په لړ کې د چاپېریال ساتنې ملي ادارې کارپوهانو د کیمیاوي موادو کنوانسيونونو، کیمیاوي پروژو او د کیمیاوي موادو د اهمیت او ارزښت په اړه معلوماتي پرېزنټېشنونه وړاندې کړل او د ګډونوالو نظرونه او وړاندیزونه واورېدل شول او پوښتنو ته یې ځوابونه ورکړل شول.
په پای کې د کیمیاوي موادو او خطرناکو زبالو اتحادیه جوړه او تر راتلونکې غونډې پورې یې موقت استازی و ټاکل شو.