وروستی
د انرژۍ د کمښت، اقلیمي بدلون او هواککړتیا سره د مبارزې ملي کنفرانس جوړ شو
د لړم ۲۸مه نېټه کابل
دچاپېریال ساتنې ملي ادارې د جرس موسسې او د اروپایي اتحاديې په همکارۍ د دې ادارې د کول حشمت د غونډو په تالار کې د انرژۍ د کمښت، اقلیمي بدلون او هواککړتیا سره د مبارزې په تړاو یو ورځنی ملي کنفرانس جوړ کړ چې پکې د پوهنتون استادانو، محصلینو، کابل ښاروالۍ د چاپېریالي روغتیا ساتنې رئیس او اړوندو ادارو استازو ګډون کړی وو.
د کنفرانس په پیل کې د چاپېریال ساتنې ملي ادارې مسلکي معین انجنیر عزت الله صدیقي د کابل ښار د هوا ککړتیا په هکله خپله اندېښنه وښوده او ویې ویل: په نړۍ کې له اقلیمي بدلون سره د سازښت او مبارزې په برخه کې د پام وړ کارونه شوي؛ خو په افغانستان کې تر اوسه پورې له اقلیمي بدلون او هوا ککړتیا سره د مبارزې په برخه کې د اړوندو ادارو تر منځ سمه همغږي نه ده شوې.
ښاغلي صدیقي د کابل ښار د هوا ککړتیا لاملونو ته اشاره وکړه او زیاته یې کړه: برېښنا شرکت باید له هوا ککړتیا سره د مبارزې په برخه کې لازم اجراآت وکړي، ده له برېښنا شرکت وغوښتل چې په ژمي باید هېوادوالو ته دوامداره برېښنا ورکړي.
ورپسې د جرس موسسې رئیس انجنیر محمد ریاض رامین د (خانه سبز کابل) پروژې د تطبیق، په ودانیو او کورونو کې د لمریزې انرژۍ د اغېزمنتیا په هکله وینا وکړه او ویې ویل: د هوا ککړتیا د راکمولو او اقلیمي بدلون سره د سازښت په موخه تمه ده چې پنځوس زره کورنۍ د (خانهی سبز) له پروژې څخه برخمنې شي چې په هغه کې د لمر له برېښنا څخه د کورونو ګرمېدل، د حرارتي پوښونو او د لمریزو برېښنایي نغریو ویشل او بایو ګاز سیسټم ده چې په جوړیدو سره به یې په سونګ توکو او هوا ککړتیا په راکمولو کې ۵۰ سلنه کموالی راشي.
د کنفرانس په لړ کې د کابل ښاروالۍ د چاپېریالي روغتیا ساتنې رئیس، حسن غلامی د هوا د ککړوونکو سرچینو په اړه خبرې وکړې او ویې ویل: د هواککړتیا د راکمولو په موخه د چاپېریال ساتنې ملي ادارې او کابل ښاروالۍ ګډ ټیمونه د کابل امنیه قومندانۍ په همکارۍ هره ورځ له مختلفو اصنافو او ککړوونکو سرچینو څخه نظارت کوي.
د کنفرانس په پای کې د کارپوهانو او متخصصینو له خوا ګډونوالو ته د اقلیمي بدلون، د چاپېریال ساتنې ملي ادارې لاسته راوړنو، له هوا ککړتیا سره د مبارزې او د نوې کېدونکو انرژیو په هکله معلوماتي پرزنټېشنونه وړاندې شول.