وروستی
د کابل ښار د هوا ککړتیا راکمولو او مخنیوي په پار ښاري کنفرانس جوړ شو
د مرغومي ۲مه نېټه کابل
کابل ښاروالۍ د هوا ککړتیا راکمولو او مخنیوي په موخه د جرس موسسې په همکارۍ د مرغومي په ۲مه نېټه ښاري کنفرانس جوړ کړ.
په یاد کنفرانس کې د کابل ښاروالۍ مسوولینو، د چاپیریال ساتنې ادارې مسلکي معین انجنیر عزت الله صدیقي، د ولایتي شورا وکیلانو، د کابل بېلابېلو ناحیو علماوو او د جرس موسسې مسوولینو برخه اخیستې وه.
د چاپېریال ساتنې ملي اداري مسلکي معین انجنیر عزت الله صدیقي هم له ککړې هوا سره د مبارزې په اړه د حکومت د دريځ او هوا ککړتیا د راکمولو او مخنیوي کړنلارې په هکله رڼا واچوله او په ښاریانو یې نیوکه وکړه چې مسوولیت منونکي نه دي او یوازې په دې برخه کې په حکومت نیوکه کوي ښاغلي صدیقي زیاته کړه: د چاپېریال ساتنې ملي ادارې د چاپېریالي چارو د مفتشینو ورځني راپورونه چې د کابل ښار له مختلفو سیمو څخه ترلاسه کیږي، ښیي چې ورځ تر بلې د کابل ښار د هوا ککړتیا مخ پر زیاتېدو ده او دا زموږ ټولو لپاره د اندېښنې وړ خبره ده. ده وویل: له هوا ککړتیا سره مبارزه او د لنډ مهاله او اوږدمهاله پلان پلي کول د دې ادارې له کاري لومړیتوبونو څخه ګڼل کیږي؛ خو اړینه ده چې ټولې اړوندې ادارې او ارګانونه، مدني ټولنې او کابل ښاریان په دې برخه کې له حکومت سره همکاري وکړي.
د کابل ښاروالۍ د ټولنیزو او فرهنګي چارو معین ښاغلي محمد فاضل شریفي وویل چې افغان دولت او اړوندې ادارې له ککړتیا څخه د کابل هوا د مخنیوي په موخه جدي کار کوي؛ خو د کابل ښاریانو له مرستې پرته ناشونې ده چې له ککړتیا څخه د کابل هوا د مخنیوي پروګرامونه بریالي شي.
د کنفرانس په لړ کې د جرس موسسې استازو خپل راپور وړاندې کړ او له لمریزې برېښنا څخه یې د ګټې اخیستنې او هوا له ککړتیا د مخنیوي په اړه یې ګډونوالو ته معلوماتي پرزنټېشن وړاندې کړ.