وروستی
د اساسي قانون د تصویب اونۍ ولمانځل شوه
د مرغومي ۲۰مه نېټه کابل
د چاپېریال ساتنې ملي ادارې لخوا نن د مرغومي په ۲۰مه نېټه د دې ادارې د کول حشمت خان د غونډو په تالار کې د اساسي قانون د تصویب اونۍ لمانځغونډه جوړه شوه چې پکې د اساسي قانون پر تطبیق د څارنې خپلواک کمیسیون، عدلیې وزارت او لویې څارنوالۍ استازو، محصلینو او د دې ادارې کارکوونکو ګډون کړی وو.
په پیل کې د چاپېریال ساتنې ملي ادارې عمومي رئیس شاه زمان میوندي ګډونوالو ته ښه راغلاست ووایه او د اساسي قانون په تړاو یې مفصلې خبرې وکړې. ده زیاته کړه: اوسنی اساسي قانون د تېرو قوانینو په پرتله ځکه با ارزښته او غوره دی چې دوه بعدي برخې لري، هم اسلامي اصولو ته پابند دی او هم پکې دموکراتيک اصول او د خلکو آزادي خوندي ده.
ښاغلي میوندي وویل: د اساسي قانون د ۱۵مې مادې پر بنسټ د چاپېریال ساتنې ملي اداره رامنځته شوې ده چې د هېواد په کچه د ژوند د چاپېریال ساتنې او د سالم ژوندانه لپاره د زمینې پر مساعدولو مکلفه ده او په دې برخه کې کابو ۲۰ دولتي ادارې مکلفې دي چې د هوا ککړتیا راکمولو او مخنیوي پنځه کلن پر پلي کیدو کې له دې ادارې سره په ګډه کار وکړي؛ همدا راز رسنۍ، اکاډميک بنسټونه، علمای کرام، مدني ټولنې او قدرمن هېوادوال مسوولیت لري چې په چاپېریال ساتنه کې رغنده ونډه واخلي.
ورپسې د اساسي قانون پر تطبیق د څارنې خپلواک کمیسیون سلاکار معرفت الماس د اساسي قانون په هکله هر اړخیزه وینا وکړه او د اساسي قانون په پلي کېدو کې یې د هېوادوالو همکاري اړینه وبلله.
د غونډې په دویمه برخه کې د دې ادارې د اطلاعاتو او عامه پوهاوي رئیس محمد قاسم رحیمي په کوربهتوب پنل جوړ شو چې پکې د اساسي قانون پر تطبیق د څارنې خپلواک کمیسیون، عدلیې وزارت او لویې څارنوالۍ استازو او قانون پوهانو برخه اخېستې وه او د اساسي قانون او چاپېریال ساتنې ملي ادارې پر حقوقي مسایلو، چاپېریالي جرمونو، د خلکو د مکلفیتونو او وجایبو په هکله یې هر اړخیز علمي بحث وکړ.