وروستی
د چاپېریال ساتنې ملي پالیسۍ د جوړولو په تړاو مشورتي غونډه وشوه
د سلواغې لومړۍ نېټه کابل
د چاپېریال ساتنې ملي ادارې لخوا نن چهارشنبه د مرغومي په لومړۍ نېټه، د چاپېریال ساتنې ملي پالیسۍ د جوړولو په پار د کابل په سرینا هوټل کې غونډه وشوه چې پکې د اړوندو دولتي ادارو معینانو، رئیسانو، د پوهنتون استادانو او نړۍوالو موسسو استازو ګډون کړی وو.
د غونډې په پيل کې د چاپېریال ساتنې ملي ادارې مسلکي معین انجنیر عزت الله صدیقي د چاپېریال ساتني ملي پالیسۍ د اړتیا او اهمیت په هکله هر اړخیزه وینا وکړه.
ښاغلي صدیقي وویل: سره له دې چې د چاپېریالي چارو د ترسره کېدو په برخه کې د چاپېریال قانون، مقررې او بېلابېلې کړنلارې موجودې دي، خو ځېنې ستونزې شته لکه: د اړوندو دولتي ادارو تر منځ وظیفوي تداخل، د بعضې مسایلو مبهم والی، اقلیمي بدلون، د هواککړتیا، ناپلانه ښاري پراختیا او نور لاملونه؛ نو جدي اړتیا ده چې د چاپېریال ساتنې ملي پالیسي جوړه شي؛ ترڅو د چاپېریال ساتنې په سکتور کې ټولې دولتي ادارې ښکېلې شي.
نوموړي وویل: د دې پالیسۍ په جوړولو سره به لومړیتوبونه تفکیک او حکومت به وتوانیږي چې په ټولو سکتورونو کې چاپېریالي برخه پیاوړې او د دوامداره او تلپاتې پراختیا موخې تامین شي.
د ناستې په لړ کې د دې ادارې د متخصصینو لخوا د چاپېریال ساتنې ملي پالیسۍ د محتوا په هکله معلوماتي پرزنتېشنونه وړاندې شول او د ګډونوالو پوښتنو ته ځوابونه ورکړل شول.
هېره دې نه وي چې د چاپېریال ساتنې ملي پالیسۍ مسوده چمتو شوې او د راتلونکي کال د سپټمبر میاشتې تر پایه به بشپړه شي.
د غونډې په پای کې د دې ادارې مسلکي معین د پالیسۍ د لا بډاینې په موخه له ګډونوالو غوښتنه وکړه چې خپل نظرونه، انتقادونه او وړاندیزونه دې له چاپېریال ساتنې ملي ادارې سره شریک کړي.
د یادولو وړ ده چې د چاپېریال ساتنې ملي پالیسۍ د جوړولو ټولې اړوندې چارې د ملګرو ملتونو د پراختیايي پروګرام (UNDP)، (UNEP) او اروپایي اتحادیې په ملاتړ ترسره کیږي.
خبریال: عبدالولي عابد
عکاس: سید امید سادات