وروستی
د اقلیم زرغون صندوق ته د افغانستان ملي برنامې جوړولو په تړاو د اړوندو وزارتونو ښځینه استازو ته درې ورځنی رونیز ورکشاپ جوړ شو
د سلواغې ۶مه نېټه کابل
د چاپېريال ساتنې ملي ادارې لخوا د ملګرو ملتونو د خوړو او کرنې سازمان FAO په تخنيکي همکارۍ او د ( GCF) په مالي ملاتړ، د اقلیم زرغون صندوق (GCF) ته د افغانستان ملي برنامې جوړولو او په هغه کې د مېرمنو د فعال ګډون په تړاو د دې ادارې د بندامیر د غونډو په تالار کې درې ورځنی روزنیز ورکشاپ پیل شو چې پکې د اړوندو ادارو ۵۰ تنو ښځینه استازو ګډون کړی وو.
په پیل کې د چاپېریال ساتنې ملي ادارې مسلکي معین انجینر عزت الله صدیقي د افغانستان د چاپېریالي وضعیت په هکله هر اړخیزه وینا وکړه او ویې ویل: اوسمهال اقلیمي بدلون یو نړۍوال ګواښ دی چې ټول هېوادونه ورسره لاس او ګریوان دي، افغانستان هم د مخ پر ودې هېوادونو په کتار کې دی چې له بده مرغه د ډېرو طبیعي ګواښونو سربېره د څو لسیزو جګړې له امله خورا زیانمن شوی، ځنګلونه او وحشي ژوي چې زموږ د هېواد طبیعي پانګه ده له جدي ګواښ سره مخ دي.
ښاغلي صدیقي وویل: له اقلیمي بدلون سره د مبارزې په برخه کې د ښځو ښکېلتیا او ګډون خورا مهم دی، د اقلیم زرغون صندوق چې له اقلیمي بدلون سره د سازښت په برخه کې د نړۍوالو مالي میکانیزمونو تر ټول ستر فنډ دی، په همدې برخه کې د مخ پر ودې هېوادونو مالي ملاتړ کوي. ده وویل: موږ ته اړینه ده چې له اقلیمي بدلون سره سازښت وکړو او د همدې صندوق د اصولو مطابق باید ۵۰ سلنه مېرمنې د طرحو په جوړولو کې ښکېلې شي؛ ترڅو افغانستان په دې وتوانیږي چې له (GCF) څخه ډیرې پروژې ترلاسه کړي.
د ورکشاپ په لړ کې د دې ادارې کارپوهانو لخوا د اقلیم زرغون صندوق د پېژندنې، اساساتو، اصولو او شته فرصتونو په هکله هر اړخیز معلوماتي پرزنټېشنونه وړاندې شول او ګډونوالو ته یې د پروژو د تخنیکي چارو په هکله هم معلومات ورکړل.
د یادونې وړ ده چې یاد ورکشاپ به درې ورځې دوام ولري او د معلوماتي پرزنټېشنونو سربېره به ګدونوالې د ګروپي کارونو په ترسره کولو سره (GCF) ته په وړاندې کوونکو طرحو کې د ښځو د ګډون او ښکېلتیا په هکله ځانګړې پالیسي جوړه او خپل نظرونه، تجربې او وړاندیزونه به د طرحو د لابډاینې په موخه له چاپېریال ساتنې ملي ادارې سره شریک کړي.