وروستی
د ژوند بڼو ملي سټراتېژۍ او عملي پلان د بیا کتنې او همدا راز په افغانستان کې د وحشي ژوو د ښکار او سوداګرۍ د ارزونې په پار دوه ورځنی مشورتي ورکشاپ ترسره شو
د سلواغې۷مه نېټه کابل
د چاپېریال ساتنې ملي ادارې مسلکي معین انجنیر عزت الله صدیقي په مشرۍ د ژوند بڼو ملي سټراتېژۍ او عملي پلان د بیا کتنې او همدا راز په افغانستان کې د وحشي ژوو د ښکار او سوداګرۍ د ارزونې په موخه دوه ورځنی مشورتي ورکشاپ ترسره شو.
دغه مشورتي ورکشاپ چې پرون د سلواغې په ۶مه نېټه پیل شوی و، نن پای ته ورسید. په یاد ورکشاپ کې د سلا او مشورې په موخه د پوهنتون استادانو، متخصصینو، د اړوندو ادارو استازو، د وردګو، پروان، کاپيسا او پنجشیر ولایتونو د چاپېریال ساتنې رئیسانو او مسلکي مدیرانو ګډون کړی وو.
په پیل کې د دې ادارې مسلکي معین د افغانستان د ژوند بڼو او وحشي ژوو د ارزښت، ساتنې او د اړوندو ادارو د مسوولیتونو په هکله هر اړخیزه وینا وکړه. ده وویل: افغانستان د سرشاره طبیعي سرچینو په درلودلو سره غني هېواد دی؛ خو له بده مرغه د ډیرو طبیعي لاملونو سربېره د څو لسیزو جګړې له امله زموږ ژوند بڼو ته خورا زیان ور اووښتی دی.
ښاغلي صدیقي زیاته کړه: د ژوند بڼو موضوع له ځانګړي اهمیت څخه برخمنه ده او د انسانانو له ژوندانه سره په فوق العاده توګه تړاو لري چې اوسمهال د جګړې سربېره، د نفوسو ډیرښت، ناپلانه پراختیا، د ټکنالوژۍ پرمختګ، ښاري پراختیا او اقلیمي بدلون هغه لاملونه دي چې ژوند بڼې یې له ګواښ سره مخ کړې دي؛ نو د دې لپاره چې ژوند بڼې وساتل شي اړینه ده چې په سټراتېژۍ یې بیاکتنه وشي. نوموړي وویل: دا سند د افغانستان لپاره ډیر با اهمیته دی، د ژوند بڼو ستراتېژي چې په ۲۰۱۴ کال کې جوړه شوې وه، اړینه ده چې نوې تجربې او د محلي متخصصینو نظرونه پکې و اوډل شي.
ورپسې د افغانستان د وحشي ژوو (WCS) موسسې رئیس ګرې شې، افغانستان د طبیعي میراثونه له اړخه غني هېواد وباله او ټینګار یې وکړ چې وحشي ژوي او ژوند بڼې یې باید وساتل شي، ده وویل: له بده مرغه په تېرو لسیزو کې د افغانستان ژوند بڼې د ښکار او ناقانونه سوداګرۍ له امله خورا اغېزمنې شوې او د دې لپاره اړینه ده چې ټولې ادارې په ګډه مبارزه وکړي.
د ورکشاپ په لړ کې د کارپوهانو او متخصصینو لخوا د ژوند بڼو د اررښت په هکله معلوماتي پرزنټېشنونه وړاندې شول او ورکشاپ د ګروپې کار، نظرونو ورکولو او تقدير پاڼو په ویشلو سره پای ته ورسېده.