وروستی
له هوا ککړتیا سره د مبارزې په پار یو ورځنی سمپوزیم جوړ شو
دکب ۲مه نېټه کابل
د چاپېریال ساتنې ملي ادارې د (نهاد راه سبز) په همغږۍ نن شنبه د کب په ۲مه نېټه د دې ادارې د کول حشمت خان د غونډو په تالار کې له هواککړتیا سره د مبارزې په پار یو ورځنی سمپوزیم جوړ کړی و چې پکې د دې ادارې مسلکي معین انجنیر عزت الله صدیقي، کرنې وزارت، کابل ښاروالۍ مدني ټولنو او د رسنیو استازو ګډون کړی وو.
په پیل کې د دې ادارې مسلکي معین انجنیر عزت الله صدیقي ګډونوالو ته ښه راغلاست ووایه او د کابل ښار د هوا ککړتیا د زیاتوالي، لاملونو او د دې ادارې د پلانونو په تړاو یې هر اړخیزه وینا وکړه، ده وویل: افغانستان جنګ ځپلی هېواد و کله چې نوی حکومت رامنځته شو حکومت او خلک د بیارغونې چارو ته خورا لېواله وو په تېرو ۱۵کلونو کې ښارونو په غیر پلاني توګه وده وکړه او په ودانیزو چارو کې چاپېریالي اصولو ته هېڅ پاملرنه ونشوه چې دا دی اوس موږ له ډیرو ستونزو او ګواښونو سره مخ یو او د کابل او نورو لویو ښارونو هوا ډیره ککړه شوې ده.
ښاغلي صدیقي زیاته کړه: دې ادارې د هوا ککړتیا راکمولو او مخنیوي لپاره پنځه کلن پلان جوړ کړی چې په هغه کې د هوا ککړتیا ۵۰ لاملونه په ګوته شوي او د جمهوري ریاست لخوا ۲۲ وزارتونه توظیف شوي؛ ترڅو دغه پلان پلی کړي. ده وویل: موږ هڅه کوو چې له مدني ټولنو، علمای کرامو، رسنیو او اکاډمیکو بنسټونو سره همغږي شو او دوی و هڅوو چې د عامه پوهاوي په برخه کې د چاپېریال ساتنې ملي ادارې سره همکار شي.
ورپسې د کابل ولایت د چاپېریال ساتنې رئیس، کاظم همایون د هواککړتیا د راکمولو په تړاو د ترسره شوو کړنو، د کابل ښاروالۍ د چاپېریالي روغتیا ساتنې رئیس حسن غلامي د کابل ښاروالۍ د تدابیري پلانونو په هکله، د کرنې وزارت د ځنګلونو رئیس محمد امان امانیار د کابل د شنه کمربند په هکله ویناوې وکړې، ښاغلي امانیار وویل: د کرنې وزارت تر اوسه پورې ۲۵۰۰ هکتاره ځمکه د شنه کمربند په توګه زرغونه کړې او نیالګي یې پکې کېنولي دي.
د سمپوزیم په لړ کې ګډونوالو د نوې کېدونکې انرژۍ د وسایلو په هکله له جوړ شوي نندارتون څخه لیدنه وکړه، ازاد بحث ترسره شو، د اکسیجن ګروپ لخوا له هوا ککړتیا سره د مبارزې په هکله تمثیلي ټوټه وړاندې شوه او سمپوزیم د نوې کېدونکې انرژۍ په اړه د معلوماتي پرزنټېشن په وړاندې کولو سره پای ته ورسیده.
د یادولو ده چې دغه سمپوزیم د (نهاد راه سبز) په همکارۍ او د کوچنیو چاپېریالي اسانتیاوو پروګرام (SGP) او (GEF) په مالي ملاتړ جوړ شوی و.