وروستی
په ملي کچه د افغانستان د ټاکل شوې ونډې د سند بیا ځلي کتنې په تړاو مشورتي کنفرانس ترسره شو
د کب ۷مه نېټه - کابل
د چاپېریال ساتنې ملي ادارې له لوري د ۱۳۹۹ کال دکب په ۷مه نېټه په پارک سټار هوټل کې په ملي کچه د افغانستان د ټاکل شوې ونډې د سند د بیا ځلي کتنې په پار یو ورځني مشورتي کنفرانس ترسره شو چې پکې د اړوندو دولتي ادارو او نړۍوالو موسسو کابو ۵۰ تنو استازو ګډون کړی وو.
د ناستې په پیل کې د چاپېریال ساتنی ملي ادارې مسلکي معین انجنیر عزت الله صدیقي ګډونوالو ته د ښه راغلاست تر څنګ زیاته کړه: اقلیمي_بدلون په نړۍواله کچه لوی ګواښ ګرځېدلی چې سږني نه اورښتونه یې ژوندۍ بېلګه کېدلی شي او دې ترڅنګ نه یوازې دا چې اقليمي بدلون د ورښتونو په برخه کې لوی ګواښ ګرځېدلی؛ بلکي زموږ په اقتصادي، ورځني، ټولنیز او د ژوند په ټولو برخو منفي اغېزې واردولی شي. د دې تر څنګ دغه بدلونونه نه یوازې دا چې په انساني ژوند منفي اغېزې واردوي، بلکي د چاپېریال ساتنې په برخه کې هم همدې ته ورته اغېزې ښندلی شي. همدا راز ښاغلي صدیقي د اقلیمي بدلون د نړۍوال ګواښ په اړه د نړۍ او هېوادونو په کچه د شویو کارونو او د افغانستان د ملي ټاکل شوې ونډې په اړه بشپړې خبرې وکړې او دغه مشورتي کنفرانس یې د افغانستان لپاره مهم او له لاسته راوړنو ډګ ګام وباله، ده له ګډونوالو غوښتنه وکړه چې په دې برخه کې خپل نظریات او وړاندیزونه شریک کړي؛ تر څو د دې سند په بیا ځلي کتنه کې ځای پر ځای او د دې لوی ګواښ د حل په برخه کې اغېزمن تمام شي.
ورپسې په افغانستان کې د ملګرو ملتونو د پراختیایي پروګرام (UNDP) مرستیال ادریس ملیار په ملي کچه د افغانستان د ټاکل شوې ونډې د سند د بیا ځلي کتنې پروسه مهمه او اړینه وبلله، زیاته یې کړه: افغانستان د هغو هېوادونو په لېست کې دی، چې د اقلیمي بدلون له لوی ګواښ سره لاس او ګرېوان دي، ده وویل چې د دې ستونزو د حل لپاره (UNDP) له افغان دولت سره په هره برخه کې همکاري کوي؛ ترڅو د اقلیمي بدلون په برخه کې د پام وړ مثبت بدلون راشي.
ده همدا راز د دغه سند د بیاځلي کتنې پروسې په برخه کې دقت ته اشاره وکړه او زیاته یې کړه، چې په دې برخه کې دې د موجوده ستونزو په نظر کې نیولو سره هر اړخیز کار وشي او په سند کې دې ځای پر ځای شي؛ تر څو د دې سند په واسطه شته ستونزې کمې او د حل وړ وګرځي.
د کنفرانس په وروستۍ برخه کې په همدې تړاو معلوماتي پرېزېنټېشنونه وړاندې شول، ګروپي کار تر سره شو او د ګډوانوالو پوښتنو او وړاندیزونو ته ځوابونه ورکړل شول.