وروستی
په ټول توان او امکاناتو د نیالګیو کېنولو ملي کمپاین ملاتړ کوو
د کب ۶مه نېټه – کابل
د چاپېریال ساتنې ملي ادارې عمومي رئیس شاه زمان میوندي له وزیرانو او دولتي چارواکو سره د خپلو لیدنو په ترڅ کې تېره ورځ د کب په ۵مه نېټه له کابل ښاروال داوود سلطانزوی سره وکتل.
په دې لیدنه کې دواړو لورو په ټول هېواد کې د نیالګیو کېنولو ملي پروسې د لا ښه تطبیق په موخه هر اړخیز بحث وکړ.
ښاغلي میوندي د نیالګیو کېنولو پروسه یوه ملي پروسه وګڼله او ویې ویل: هغه پلان چې د چاپېریال ساتنې ملي ادارې او اړوندو ادارو په همکارۍ جوړ شوی، د کابل ښاروالۍ رول با ارزښته دی.
په دې لیدنه کې دواړو خواوو د ۱۴۰۰کال د نیالګیو_کېنولو_ملي_کمپاین او پلان پر ښه تطبیق ټینګار وکړ.
د یادولو وړ ده چې د لیدنو دغه لړۍ به د نیالګیو کینولو ملي پروسې په تړاو د دولتي ادارو تر منځ د همغږۍ د لاپیاوړتیا په خاطر د چاپیریال ساتنې ملي ادارې له لوري ادامه ولري. د منظور شوي پلان پر اساس به سږ کال د دولتي ادارو او د ټولنې مختلفو اقشارو لخوا په ټول هیواد کې ۲۵ میلیونه نیالګي کینول شي.
د ناستې په پای کې دواړو خواوو ټینګار وکړ چې د کب ۲۰مه نېټه چې دنیالګیو کېنولو ملي ورځ ده، باید د شاندارو مراسمو په ترڅ کې ولمانځل شي او د دې ملي پروسې د لا ښه تطبیق په موخه همغږي پیاوړې شي.