وروستی
د کرنې، اوبو لګولو او مالدارۍ وزیر: د نيالګيو کېنولو ملي کمپاین په تړاو د چاپېریال ساتنې ملي ادارې هڅې د ستایلو دي
۱۳۹۹کال د کب ۱۱مه نېټه کابل
دچاپېریال ساتنې ملي ادارې عمومي رئیس شاه زمان میوندي د کرنې، اوبو لګولو او مالدارۍ له وزیر ډاکټر انور الحق احدي سره وکتل.
په دې ليدنه کې دواړو لوریو د ۱۴۰۰ کال د نیالګیو کېنولو ملي کمپاین او د نيالګيو وېشلو په تړاو د کرنې، اوبو لګولو او مالدارۍ وزارت د رول په هکله بحث وکړ.
ښاغلي ميوندي له دې ادارې سره د کرنې، اوبو لګولو او مالدارۍ وزارت د همېشنۍ همکارۍ او همغږۍ ستاينه وکړه، د نيالګيو کېنولو پروسې او په دې تړاو يې د چاپېریال ساتنې ملي ادارې د جوړ شوو پلانونو په هکله معلومات ورکړل، د نيالګيو کېنولو په کمپاین، د شنو کمبربندونو په جوړولو او د شنو ساحو په پراختيا کې يې د ياد وزارت رول با ارزښته وباله.
همدا راز ښاغلي انورالحق احدي د نیالګیو کېنولو ملي کمپاین په تړاو د چاپېريال ساتنې ملي ادارې هڅې وستایلې او د دې وزارت د ټول ظرفیت په پام کې نیولو سره يې د نيالګيو د ويشلو ډاډ ورکړ. ده وويل: هیله مند یو چې په دې کمپاین کې اړوندې ادارې له موږ سره پوره همکاري وکړي.
د لومړي ځل لپاره د نیالګیو کېنولو کمپاین تېر کال پيل او په ترڅ کې يې د ټول هيواد په کچه له ۱۷ ميلیونو څخه زیات نيالګي کېنول شول.
هرا فغان یوه ورځ یو نیالګی
د سولې او ښېرازۍ نیالګی