وروستی
د چاپېریالي چارو د همغږۍ کمېټې غونډه وکړه
د وري۲۶مه کابل
د چاپېریال ساتنې ملي ادارې لخوا پرون د وري په ۲۶مه د دې ادارې د بند امیر د غونډو په تالار کې د چاپېریالي چارو د همغږۍ کمېټې لومړنۍ غونډه جوړه شوه، چې پکې د اړوندو ادارو کابو ۵۰تنو رئیسانو او استازو ګډون کړی وو.
په پیل کې د دې ادارې د پالیسۍ، پلان او نظارت معین ډاکټر احمد حسیب پایاب ګډونوالو ته ښه راغلاست ووایه او د کابل ښار د چاپېریالي ستونزو په اړه یې وینا وکړه. ده وویل: اوسمهال کابل ښار له ډېرو چاپېریالي ستونزو لکه د هواککړتیا، ناپلانه ښاري ودې سربېره له درې سترو ګواښونو (د کانالیزاسیون نه شتون، د ځمکې لاندې اوبو ککړتیا او د نفوسو ډېرښت) سره مخ دی.
ښاغلي پایاب وویل: موږ د اوسني او راتلونکي نسل پر وړاندې مسوول یو چې چاپېریالي ستونزې حل کړو او په خپلو پالیسیو کې ځای ورکړو. ده زیاته کړه: دا اداره اوسمهال په بېلابېلو څېړنیزو موضوعاتو کار کوي، ترڅو چاپېریالي ستونزې په ګوته شي او حل لارې چارې ورته ولټول شي او یاده اداره پر اقتصادي، سیاسي او حکومتي چاپېریال باندې ټینګار کوي. نوموړي هیله مندي وښووده چې د چاپېریال ساتنې ملي اداره په دې هڅه کې ده چې د هېواد د چاپېریالي وضعیت د ښه والي او له اقلیمي بدلون سره د مبارزې په برخه کې به له نړۍوالو مالي میکانیزمونو څخه هم ډېرې مرستې را جلب کړي.
ورپسې د دوامداره پراختیایي چارو د ارزونې رئیس انجنیر نقیب الله صدیقي د کابل ښار د کانالیزاسیون د نه شتون او له فاضلابو څخه د را پیدا شوو ستونزو په هکله هر اړخیزه وینا وکړه.
د غونډې په لړ کې د اقلیمي بدلون رئیس روح الله امین د افغانستان د اقلیمي بدلون په هکله وینا وکړه او د طبیعي میراثونو رئیس جلال الدین ناصري د هوا ککړتیا د راکمولو د څرنګوالي په اړه خپل معلوماتي پرزنټېشن وړاندې کړ.
د اړوندو ادارو استازو خپلې پوښتنې، نظرونه او وړاندیزونه شریک کړل او د غونډې په پای کې لاندې پرېکړې وشوې:
۱- د اړوندو ادارو تر منځ باید همغږي او همکاري لا پیاوړې شي.
۲- د فاضلابو د ستونزو د حل لپاره باید متمرکزې او غیر متمرکزې تصفیه خانې جوړې شي.
۳- د فاضلابو ټانکرونو د خالي کېدو لپاره باید په لنډ مهال ډول تصفیه خانې جوړې شي؛ ترڅو فاضلاب پکې خالي شي.
۴- د مخابراتو وزارت او شاوخوا ادارو د فاضلابو د تصفیه خانې جوړولو لپاره چې کوم ځای په پام کې نیول شوی، د یوه پلاوي لخوا دې نظارت او ژر تر ژره دې دا ستونزه حل شي.
۵- د چاپېریالي چارو د همغږۍ کمېټه باید د چاپېریالي اقتصاد، چاپېریالي سیاست او چاپېریالي چارو مدیریت په برخه کې داسې کار وکړي چې مشخصې او ګټورې پایلې ولري.