وروستی
د چاپېریالي همکارۍ د لا پراختیا په موخه د پلازمېنې زون د پراختیا ادارې له استازو سره ناسته وشوه
د وري۲۸مه کابل
د چاپېریال ساتنې ملي ادارې د واخان د غونډو په تالار کې پرون د وري په ۲۸مه نېټه د چاپېریالي همکارۍ د لا پراختیا په موخه د پلازمېنې زون د پراختیا ادارې له استازو سره ناسته وشوه.
په دې ناسته کې د دې ادارې د پالیسۍ، پلان او نظارت معین ډاکټر احمد حسیب پایاب، رئیسانو، د پلازمېنې زون د پراختیا ادارې حقوقي سلاکار جارالله منصوري او ورسره راغلي ټیم ګډون کړی وو.
په پیل کې ښاغلي منصوري د پلازمېنې زون د پراختیا ادارې د قانون د مسودې او د دواړو ادارو د مشترکو کارونو په تړاو معلوماتي پرېزنټېشن وړاندې کړ او ټینګار یې وکړ چې د نوي کابل پروژې په تطبیقي چارو کې باید له پیل څخه تر پایه پورې د چاپېریال ساتنې ملي اداره همکاري وکړي.
ښاغلي پایاب وویل: موږ باید د اقتصادي پراختیا او چاپېریال ساتنې/ مدیریت تر منځ توازن وساتو، د چاپېریال او طبیعت ساتنه زموږ بقا تضمینوي، له بده مرغه د بېلابېلو دولتي ادارو لخوا په پراختیایي پلانونو او پروژو کې د چاپېریال ساتنې اصول او شاخصونه په پام کې نه نیول کېږي.
د چاپېریال ساتنې ملي اداره له اړوندو ادارو سره هر راز همکارۍ ته چمتو ده او په نېږدې راتلونکي کې به د پلازمېنې زون د پراختیا له ادارې سره د همکارۍ د لا پیاوړتیا په موخه تفاهم لیک لاسلیک کړي او په ګډه به یوه تخنیکي او کاري کمېټه جوړوي؛ ترڅو یوځای پراختیایي چارو او نړۍوالو مالي میکانیزمونو ته د پروژو یادښتونه (Concept notes) او پروپوزلونه جوړ او له اقلیمي بدلون سره د سازښت او مبارزې په برخه کې نړیوالې مرستې تر لاسه کړي. همدارنګه د چاپېریال ساتنې ملي اداره پلان لري ترڅو د څېړنو د ترسره کولو او پروژو د یادښتونو او پروپوزلونو د جوړولو لپاره د دې ادارې تر چتر لاندې یو خپلواک واحد (Research and Development Unit) جوړ کړي.
د دغه واحد په وسیله ترسره کېدونکې څېړنې به د غوره پالیسیو، ستراتیژیګانو او پلانونو په جوړولو کې ګټورې پایلې ولري او په علمي اصولو ولاړ چاپېریال ساتنې ته به زمینه برابره کړي.