وروستی
د اقلیمي چارو بېړنۍ ملي کمېټې لومړنۍ غونډه وکړه
د چنګاښ ۲۴مه کابل
د چاپېریال ساتنې ملي ادارې عمومي رئیس پښتون عاطف په مشرۍ پرون (سه شنبه د چنګاښ په ۲۳مه نېټه) د اقلیمي چارو بېړنۍ ملي کمېټې لومړنۍ ناسته وکړه چې پکې د دې ادارې مسلکي معین انجنیر عزت الله صدیقي، د اړوندو وزارتونو او ادارو معینانو او د پوهنتون استادانو ګډون کړی وو.
د غونډې په پیل کې ښاغلي عاطف د ګډونوالو هرکلی وکړ او له اقلیمي بدلون سره د مبارزې او سازښت په برخه کې یې د دې ادارې وظایفو او مسوولیتونو ته اشاره وکړه او زیاته یې کړه: "سره له دې چې د افغانستان د ګلخانهیي ګازونو د خپرولو کچه خورا ټیټه ده؛ خو د اقلیمي بدلون له اغېزو څخه ډیر زیات اغیزمن هیواد دی".
نوموړي په هېواد کې اقلیمي بدلون د بې وخته ورښتونو او وچکالۍ لامل وباله او د کمېټې له ټولو غړو وغوښتل چې د اقليمي بدلون او ایکوسیستمونو د ساتنې پروژو د پلي کېدو په برخه کې د چاپېریال ساتنې ملي ادارې سره همکاري وکړي.
ورپسې د دې ادارې مسلکي معین انجنیر عزت الله صدیقي په تېرو کلونو کې د اقلیمي بدلون په برخه کې د دې ادارې د فعالیتونو او اقداماتو په تړاو لنډ راپور وړاندې کړ او د غونډې ګډونوالو ته یې هر اړخیز معلومات ورکړل.
همدا راز د غونډې په لړ کې د اقليمي بدلون ریاست د افغانستان د ټاکل شوې ونډې سند (NDC) د بیاکتنې په هلکه معلوماتي پرزنټېشن وړاندې کړ، د اقلیم زرغون صندوق څخه د اعتبار لیک د ترلاسه کولو پروسې، د هېواد ملي برنامې، د اقلیمي بدلون (۲۶) نړیوال کنفرانس (COP26) د جوړیدو او د (Task force) کاري ګروپ د جوړیدو په هکله یې ګډونوالو ته معلومات ورکړل.
د کمېټې غړو له هر اړخیز بحث وروسته د اقلیمي بدلون ملي کمېټې نوم (د اقلیمي چارو بېړنۍ ملي کمېټه) ونوماوه او پرېکړه یې وکړه چې هر درې میاشتې وروسته دې یاده کمېټه غونډې وکړي، اړوندې تخنیکي ادارې باید خپل استازي معرفي کړي او خپلې طرحې او کانسېپټونه دې را و استوي.