وروستی
د نیالګیو کېنولو ملي کمېټې رئیس ټینګار وکړ چې د خصوصي سکتور د اقتصادي سیاستونو سره مناسب اوږدمهاله پلان دې جوړ شي
د چنګاښ ۲۴مه کابل
د چاپېریال ساتنې ملي ادارې عمومي رئیس په مشرۍ د نیالګیو کېنولو ملي کمېټې د پنجشنبې په ورځ (د چنګاښ په ۲۴مه) د دې ادارې د بند امیر د غونډو په تالار کې لومړنۍ غونډه وکړه.
په دې ناسته کې چې د اړوندو ادارو معینانو او رئیسانو هم ګډون کړی وو؛ د روان کال لپاره د نیالګیو کېنولو د چمتووالي په تړاو بحث او خبرې اترې وشوې.
د نیالګیو د تعداد لپاره ټاکل شوی هدف، تخنیکي چمتووالی، په ۱۴۰۰ کال کې د خصوصي سکتور، موسسو، تحصیلي بنسټونو او خلکو د ونډې؛ د نیالګیو کېنولو د مختلفو میکانیزمونو او کړنلارو په تړاو هر اړخیز بحث وشو.
د وروستیو کلونو تجربو او د ځینو هیوادونو بریالیو تجربو ته په کتو، پریکړه وشوه چې د نیالګیو کېنولو په برخه کې د ملي پلان جوړولو لپاره دې یوه تخنیکي کمیټه جوړه شي او د کمیټې مشرتابه غړو ته د راپور له وړاندې کولو وروسته به کمېټه پریکړه کوي.
د چاپېریال ساتنې ملي ادارې او د نیالګیو کېنولو ملي کمیټې رئیس پښتون عاطف د ځینو هیوادونو تجربو ته په اشارې سره ټینګار وکړ چې د نیالګیو کېنولو په ملي کمپاین کې او د کېنول شوو نیالګیو په ساتنه او پالنه کې د خلکو ونډه خورا مهمه ده.
ښاغلي عاطف وویل: کمیټه دې له جوړیدو او کار کولو وروسته داسې ګټورې کړنلارې او میکانیزمونه وړاندیز کړي چې د تطبیق وړ وي.
د نیالګیو کېنولو ملي کمېټې مشر په داسې حال کې چې په هیواد کې د ځنګلونو جوړولو لپاره د 5 څخه تر 10 کلن پلان سره موافقه وکړه، زیاته یې کړه: "دا میکانیزم باید د قوانینو، موجوده امکاناتو او اقتصادي ګټورو سیاستونو په رڼا کې جوړ شي. "