وروستی
په COP26 کنفرانس کې به یو باصلاحیته پلاوی د نړیوالو چاپېریالي مرستو ترلاسه کولو لپاره ګډون وکړي
۱۴۰۰یم کال د زمري ۱۴مه کابل
د چاپېریال ساتنې ملي ادارې عمومي رئیس پښتون عاطف تېره ورځ د (زمري په ۱۳مه نېټه) د یوه ویډیویي کنفرانس له لارې د ملګرو ملتونو د پراختیایي چارو ادارې (UNDP) له رئیس عبدالله الدرداري سره د چاپېریالي مسایلو په تړاو بحث او خبرې وکړې.
ښاغلي عاطف د ملګرو ملتونو د پراختیايي ادارې د دوامداره همکاریو او ملاتړ څخه مننه وکړه او زیاته یې کړه چې د چاپېریال ساتنې په برخه کې نړیوالو مالي سرچینو ته لاسرسی د چاپېریال ساتنې ملي ادارې له کاري لومړیتوبونو څخه ګڼل کیږي او دا اداره به هڅه وکړي چې د COP26 غونډې ته یو با صلاحیته او پیاوړی پلاوی ورولیږي؛ ترڅو وکولای شي د افغانستان لپاره د مالي مرستو په راجلبولو کې مهم رول ولوبوي.
د چاپېریال ساتنې ملي ادارې عمومي رئیس وویل: موږ تمه لرو چې د افغانستان لپاره د ملګرو ملتونو استازولي په COP26 غونډه کې د افغانستان بشپړ ملاتړ وکړي او د اقلیم زرغون صندوق (GCF) څخه د مالي مرستو د ترلاسه کولو په چټکتیا او آسانتیا کې له دې ادارې سره جدي او لازمه همکاري وکړي.
د (UNDP) رئیس ښاغلي الدردادي د چاپېریال ساتنې ملي ادارې عمومي رئیس ته ډاډ ورکړ چې په یادو مواردو کې به له دې ادارې سره د افغانستان د چاپېریالي وضعیت او چاپېریالي لومړیتوبونو ته په کتو همکاري وکړي.