وروستی
د چاپېریال ساتنې ملي ادارې سرپرست: د نړیوالو او ملي ارګانونو سره هر ډول همکارۍ ته چمتو یو
۱۴۰۰ کال د سلواغې ۳مه کابل
د چاپېریال ساتنې ملي ادارې سرپرست، ډاکټر زین العابدین عابد په مشرۍ د ګلخانهیي ګازونو د خپریدو د راکمولو او اقلیمي بدلون سره د سازښت او کرنې سکتور په برخه کې د راپور ورکولو، څارنې او ظرفیت لوړولو پروژو په تړاو له ښکېلو بنسټونو سره آنلاین غونډه وشوه.
په پیل کې د دې ادارې د اقلیمي بدلون رئیس روح الله امین د یادو پروژو په هکله معلومات ورکړل او ویې ویل: تمه وه چې د پلان مطابق به د ګلخانهیي ګازونو د خپریدو د راکمولو او اقلیمي بدلون سره د سازښت او کرنې سکتور په برخه کې د راپور ورکولو، څارنې او ظرفیت لوړولو پروژې عملي چارې د روان کال د وږي په میاشت کې پیل شي؛ خو د سیاسي بدلون له امله وځنډېدې.
ورپسې د چاپېریال ساتنې ملي ادارې سرپرست ډاکټر زین العابدین عابد، د ملګرو ملتونو د خوړو او کرنې سازمان (FAO) او (WHH) له موسسې وغوښتل چې ژر تر ژره دې د یادې پروژې عملي چارې پیل کړي.
ښاغلي عابد وویل: د چاپېریال ساتنې ملي ادارې چارې لکه د پخوا په څېر روانې دي او موږ د نړیوالو او ملي ارګانونو سره هر ډول همکارۍ ته چمتو یو.
په پای کې د ملګرو ملتونو د خوړو او کرنې سازمان (FAO) او (WHH) موسسې مسوولینو ژمنه وکړه چې د یادې پروژې د عملي چارو د پیل کیدو لپاره به هلې ځلې وکړي.