وروستی
د چاپېریال ساتنې ملي ادارې سرپرست د اغاخان بنسټ د کور جوړونې موسسې له رئیس سره وکتل
د سلواغې ۲۸مه کابل
د چاپېريال ساتنې ملي ادارې سرپرست ډاکټر زین العابدين عابد او مسلکي معين انجنیر عزت الله صديقي د اغاخان بنسټ د کور جوړونې موسسې له رئیس ښاغلي شادمان حاجي بیکوف سره په خپل کاري دفتر کې وليدل.
د دې ادارې عمومي رئیس په هېواد کې د طبيعي پېښو او اقلیمي بدلون سره د مبارزې په برخه کې د اغاخان بنسټ د کور جوړونې موسسې د مشرتابه له هلو ځلو خوښي څرګنده کړه او ويې ويل: د دې ادارې کارونه لکه د پخوا په څېر دوام لري او موږ له ملي او نړيوالو موسسو سره هر ډول همکاري ته چمتو يو.
ښاغلي عابد د اغاخان بنسټ څخه غوښتنه وکړه چې له اقليمي بدلون او طبيعي پېښو سره د مبارزې، د نيالګيو کېنولو پروسې، له اقليمي بدلون سره د سازګارې ټکنالوژۍ د استفادې، طبیعي پېښو او اقلیمي بدلون څخه اغېزمنو سيمو د ملاتړ په برخو کې له افغانستان سره همکاري وکړي.
ورپسې د اغاخان مؤسسې رئیس د خپلو برنامو او فعاليتونو په هکله معلومات ورکړل او ژمنه يې وکړه چې د معلوماتو د تبادلې، د طبيعي پېښو د مدیریت، د نيالګيو کېنولو پروسې او اقليمي بدلون سره د مبارزې په برخو کې به له دې ادارې سره همکاري کوي.