وروستی
د هوا ککړتیا راکمولو، د چاپېریالي جوازونو د ویش لړۍ ساده کولو او د سترو فابریکو د چاپېریالي چارو د ارزونې په موخه د دې ادارې مشرتابه پلاوي له یو شمېر سوداګرو او صنعتکارانو سره ولیدل
د ۱۴۴۳ق کال د ذالقعدې ۱۶مه نېټه - کابل
د کابل ښار د هوا ککړتیا د راکمولو، د چاپېریالي جوازونو د ویش لړۍ د ساده کولو او د سترو فابریکو د چاپېریالي چارو د ارزونې په موخه نن د غبرګولي په ۲۶مه نېټه د چاپېریال ساتنې ملي ادارې سرپرست حافظ عزیز الرحمن په مشرۍ نظارتي ټیم چې د دې ادارې پالیسي او مسلکي معین ډاکټر زین العابدین عابد، رئیسانو او مفتشینو یې هم ملتیا کوله، د کابل د صنایعو او کانونو خونې له رئیس او صنعتکارانو سره غونډه وکړه او همدا راز له د دوو سترو فابریکو فعالیتونه یې له نېږدې وکتل.
غونډه د قران عظیم الشان د مبارکو آیتونو په تلاوت پیل او د صنایعو او کانونو خونې رئیس د مېلمنو هرکلی وکړ او د صنعتکارانو د ستونزو په هکله یې مفصلې خبرې وکړې. نوموړي وویل: د دولتي ادارو او صنایعو خونې تر منځ باید همکاري او همغږي پیاوړې شي، د جوازونو د ورکړې پروسه باید اسانه او چټکه شي، د جوازونو په ورکړه کې باید د سترو او کوچنیو فابریکو توپیر په نظر کې ونیول شي او وخت پر وخت باید د هوا ککړتیا د مخنیوي په موخه له فابریکو نظارت وشي.
په ترتیب سره څو تنو صنعتکارانو په سمه توګه د اوبو د مدیریت، د چاپېریال ساتنې ملي ادارې په کارونو کې د نورو ادارو د نه مداخلې او د صنعتي پارکونو د زبالو د تنظیم په هکله ویناوې وکړې او د دې ادارې له مشرانو یې د همکارۍ غوښتنه وکړه او ژمنه یې وکړه چې پوره هڅه به کوي چې په خپلو فعالیتونو کې چاپېریالي اصول او قوانین په پام کې ونیسي.
د دې ادارې سرپرست حافظ عزیزالرحمن د صنعتکارانو ستونزې او وړاندیزونه واورېدل او د همکارۍ ډاډ یې ورکړ، ده وویل: د چاپېریال ساتنې ملي ادارې د رامنځته کېدو موخه همدا ده چې د انسانانو او ټولو ژوندیو موجوداتو ژوند وساتي او دا دې ادارې مسوولیت دی چې د هېواد چاپېریالي ستونزو ته حللارې ولټوي.
ښاغلي حاجي حافظ زیاته کړه: صنعتکاران د حکومت د ملا د تیر حیثیت لري او موږ دې ته ژمن یو چې په کارونو کې به اسانتیا را منځته کوو.
د دې ادارې مسلکي معین ډاکټر زین العابدین عابد په سمه توګه د ځمکې لاندې اوبو پر مدیریت ټینګار وکړ او له صنعتکارانو یې وغوښتل چې د اوبو د مصرف په برخه کې باید جدي پاملرنه وکړي؛ ځکه دا مهال د افغانستان ځمکې لاندې اوبه له زیاتو ننګونو سره مخ دي.
ښاغلي عابد وویل: موږ ټول باید خپل چاپېریال ته جدي پاملرنه وکړو او ستونزو ته په ګډه حللارې ولټوو. نوموړي له ټولو صنعتکارانو وغوښتل چې د چاپېریالي جرایمو مخنیوي وکړي او د فابریکو سټندردونه باید معیاري کړي.
د دې ادارې د بنسټیزو چاپېریالي چارو د ارزونې رئیس نقیب الله صدیقي د چاپېریالي جوازونو د ویش لړۍ په هکله خبرې وکړې او وویل چې موږ نوې طرحه جوړه کړې ده چې پر بنسټ به یې د کوچنیو فابریکو جوازونه د یوې او دوو ورځو په جریان کې او د سترو فابریکو جوازونه د یوې اونۍ په لړ کې صادر شي.
د صنعتکارانو سره تر لیدنې کتنې وروسته د چاپېریال ساتنې ملي ادارې سرپرست او ورسره پلاوي د اطلس پاور پي وي سي او خان سټیل فابریکو فعالیتونه له نېږدې وکتل او د چاپېریالي اصولو د لاښه تطبیق په هلکه یې مسوولینو ته لازمې لارښوونې وکړې.