وروستی
د چاپېریال ساتنې ملي ادارې د کابل ښاروالۍ د فعالیتونو او لاسته راوړنو قدرداني وکړه
۱۴۴۵کال
د صفر ۲۸مه/
کابل
د چاپېریال ساتنې ملي ادارې د مشرتابه له خوا نن د ۱۴۴۵کال د صفر المظفر په ۲۸مه نېټه د دې ادارې د بند امیر
د غونډو په تالار کې د کابل ښاروالۍ د غوره خدمتونو ترسره کولو په منظور د یوې غونډي
پرمهال د هغوی د فعالیتونو او لاسته راوړنو قدرداني وکړه.
په دې مراسمو کې د چاپېریال ساتنې ملي ادارې عمومي رئیس
حافظ عزیر الرحمن، د مالي او اداري چارو معین مولوي عبدالسلام حقاني، د ادارې رئیسانو
او کارکوونکو، د کابل ښاروالۍ معینانو، د دفتر رئیس، د حفظ او مراقبت رئیس، تخنیکي
ټیم او کارکوونکو کډون کړی وو.
د غونډې په پیل کې د چاپېریال ساتنې ملي ادارې د مالي او
اداري چارو معین مولوي عبدالسلام حقاني د کابل ښاروالۍ کړنې وستایلې او مننه یې ترې
وکړه چې کابل ښاروالي په خپلو فعالیتونو کي د پام وړ لاسته راوړني لري او ملت یې
له کړنو راضي دی.
ښاغلي حقاني وویل: د چاپېریال ساتني ملي ادارې ته د غځېدلي
سړک په پخولو سره به نه یوازې د دولتي ادارو ستونزې حل شي بلکې د دې سړک شاوخوا مېشت
خلک به هم نور دوړو او خټو له ستونزو خلاص شي.
ورپسې د چاپېریال ساتنې ملي ادارې عمومي رئیس حافظ عزیزالرحمن وینا وکړه او ویې ویل چې د هېواد
آبادي او بیارغاونه هم جهاد دی او هر څوک چې په دې لاره کې هڅې کوي الله تعالی به
ورته د جهاد اجر ورکړي.
ښاغلي حافظ د کابل ښاروالۍ فعالیتونه وستایل او زیاته یې کړه
چي کابل ښاروالۍ په تیرو دوو کلونو کي په انکشافي او نورو برخو په ځانګړې توګه د
چاپېریال په ساتنه کي د پام وړ پروژې پلي کړي چي د ستایلو وړ دي.
د کابل ښاروالۍ مرستیال مولوي خالد سجستاني د چاپېریال ساتنې
ملي ادارې له مشرتابه څخه مننه وکړه او ویې ویل چې موږ د ملت خادمان یو او دا خپل
مسوولیت ګڼو چې د هېواد د بیارغاونې لپاره به نه ستړې کېدونکې هلې ځلې کوو.
ده وویل: د کابل ښاروالۍ ټول عواید د ملت څخه راټولیږي چې
په هغه کې غریبان، کونډې او یتیمان هم شامل دي؛ نو موږ هڅه کوو چې د ملت څخه راټولې
شوې پیسې بېرته د ملت هوساینې لپاره په مناسبو ځایونو کې مصرف کړو.
د غونډې په لړ کې د چاپېریال ساتنې ملي ادراې مشرتابه له
خوا د کابل ښاروالۍ د غوره خدمتونو په ویاړ د کابل ښاروالۍ ته مننلیک ورکړل شو او
د هلوځلو قدرداني یې وشوه.
