د اسلامي نظام د ساتنې او په سمه توګه د مسوولیتونو د ترسره کولو په تړاو اصلاحي وینا وړاندې شوه

۱۴۴۵کال د ربیع الاول ۶مه نېټه/ کابل
د  چاپېریال ساتنې ملي ادارې د دعوت او ارشاد رياست له لوري د اصلاحي ويناوو په لړ کې نن د ربیع الاول په ۶مه نېټه د دې ادارې ټولو کارکوونکو او مسوولینو ته "د اسلامي نظام د ساتنې او په سمه توګه د مسوولیتونو د ترسره کولو" په تړاو د دې ادارې د مالي او اداري چارو معین مولوي عبدالسلام حقاني له خوا هر اړخیزه معلوماتي وینا وړاندې شوه.

د غونډې په پیل کې د قران عظیم الشان مبارک آیتونه ولوستل شول ورپسې د چاپېریال ساتنې ملي ادارې د مالي او اداري چارو معین ګډونوالو ته هر اړخیزه اصلاحي وینا وکړه. نوموړي وویل: افغانان له یوې اوږدې مبارزې ورسته د اسلامي نظامي نظام څښتنان شول او اوس چې لله الحمد اسلامي نظام حاکم د دې ساتنه زموږ ټولو مسوولیت دی ځکه چې په اسلامي نظام کې د مسلمان ایمان، عقل، سر،مال او عزت خوندي وي.

ښاغلي حقاني له مسوولینو او کارکوونکو وغوښتل چې خپل مسوولیتونه باید په پوره امانت دارۍ سره ترسره کړي، په خپلو کې همکار وي، له منکراتو او ګناهونو څخه باید ځانونه وساتي او د بیت المال ساتنې ته جدي پاملرنه وکړي.

د غونډې په لړ کې د دې ادارې د دعوت او ارشاد رئیس مولوي هدایت الله فتاحي هم وینا وکړه او اصلاحي وینا یې د مسلمانانو په ژوند کې خورا با اهمته وبلله او له ګډونوالو یې وغوښتل چې خپلې ورځنۍ چارې، سیرت او صورت د اسلامي احکامو مطابق عیار کړي.

Sep 21, 2023