وروستی
د اقلیمي بدلون په تړاو يو ورځنی مشورتي بحث ترسره شو
۱۴۴۵کال د ربیع الثاني ۲۲مه/ کابل
د چاپیریال ساتنې ملي ادارې او REHA (د پياوړتيا لوړلو، چاپېريال ساتنې او بشري
مرستو) موسسې په ګډه همکارۍ د اقلیمي بدلون د اغېزو، موجوده فرصتونو، نړيوالو فنډونو،
شته امکاناتو او حللارو په تړاو په کابل سټار هوټل کې یو ورځنی مشورتي بحث ترسره
شو.
په دې غونډه کې د اړوندو امارتي ادارو باصلاحيته استازو، د پوهنتونونو استادانو،
ملي او نړیوالو مؤسسو مسوولینو، خصوصي
سکتور استازو، متخصصینو، او محصلینو ګډون کړی وو.
غونډه د قرآن عظیم الشان مبارکو آیاتونو په تلاوت پیل او د REHA مؤسسې رئیس
محمد يوسف حميدیان د ګډونوالو هرکلی وکړ او د غونډې د اهدافو په هکله يې ګډونوالو
ته معلومات ورکړل.
د چاپېريال ساتنې ملي ادارې د مالي او اداري چارو معين مولوي عبدالسلام حقاني د
اقليمي بدلون د ناوړه اغېزو په هکله خبرې وکړې او زياته يې کړه: د پرمختللو
هيوادونو د بېرويې صنعتي فعاليتونو او ګلخانه يي ګازونو د زيات توليد له کبله کم
ودې هېوادونه د اقلیمي بدلون د ناوړه اغېزو څخه ډير زيات اغېزمن شوي چې افغانستان
هم يو له دغو هيوادونو څخه شپږم هېواد دی چې ډير زيات اغېزمن شوی.
نوموړي وويل: دا د نړيوالو ذمهواري ده چې د اقلیمي بدلون څخه اغيزمن هېوادونو ته
جبران خساره ورکړي.
ښاغلي حقاني پر نړۍوالو غږ وکړ چې چاپېریالي موضوعات سیاسي نه کړي ځکه دا بشري موضوعات دي چې ګټه او زیان یې یوازې ولسونو ته رسیږي؛ افغانستان اوسمهال په جدي توګه له اقلیمي بدلون څخه اغېزمن هېواد دی په داسې حال کې چې د ګلخانهيي ګازونو په خپرولو کې ونډه نه لري.
ښاغلي حقاني له نړيوالو وغوښتل چې د اقلیمي بدلون په تړاو د افغانستان تعلیقي پروژې
بېرته پيل کړي او په نړۍوالو چاپېریالي غونډو کې د دې ادارې مسوولینو ته د ګډون
اجازه ورکړي او همدا راز د COP په ټولو غونډو کې افغانستان ته هم د ګډون
بلنه ورکړل شي.
د چاپېريال ساتنې ملي ادارې د مالي او اداري چارو معين وويل: موږ د چاپېريالي
ستونزو او اقليمي بدلون سره د مبارزې په برخه کې تدابیري پلانونه جوړ کړي او خپلې هلې ځلې به جاري وساتي. ده د REHA مؤسسې څخه مننه
وکړه چې د اقلیمي بدلون په تړاو مشورتي غونډې جوړوي.
د کابل ولایت د اقتصاد رئیس مولوي حامد ابراهيم د چاپېريال ساتنې په هکله د اسلامي
شريعت د سپارښتنو په تړاو وینا وکړه د ملي او نړیوالو بنسټونو څخه يې وغوښتل چې
خپلې بوديجې د بنيادي پروژو په تطبیق مصرف کړي؛ ترڅو د ملت اساسي ستونزې حل شي.
نوموړي له نړيوالو وغوښتل چې د چاپېریال ساتنې او اقلیمي بدلون په تړاو نړيوالو
غونډو کې باید د افغانستان استازو ته د ګډون اجازه ورکړي؛ ترڅو د چاپېريالي ستونزو
په تړاو د خپل حق غوښتنه وکړي.
د غونډې په لړ کې د ملګرو ملتونو سياسي استازولۍ(یوناما) مرکزي زون مسؤلې مېرمن ایوا دانوټا سيټکوسکا وینا وکړه او اقليمي بدلون يې د بشري ټولنې لپاره ستر ګواښ وباله چې د ټولنې ټول اقشار ترې اغېزمن دي.
نوموړې ژمنه وکړه چې د افغانستان غږ به نړيوالې ټولنې ته رسوي.
د (REHA) موسسې مرستیال انجینر عزت الله صدیقي د اقليمي بدلون د اغېزو،
موجوده فرصتونو، نړيوالو فنډونو او حل لارو په تړاو هر اړخيز معلوماتي پرزنټیشن وړاندې
کړ.
د غوڼدې په پای کې د ګډونوالو نظرونه او وړانديزونه واورېدل شول چې په راتلونکو
غونډو کې به د افغانستان اسلامي امارت له لوړ پوړو چارواکو سره شریک؛ تر څو لازمې
حل لارې چارې ورته ولټول شي.