وروستی
په افغانستان کې د ملګرو ملتونو د پراختيايي ادارې UNDP رئیس د چاپېریال ساتنې ملي ادارې له عمومي رئیس سره وکتل
۱۴۴۵کال د جمادي الاول ۱۳مه/ کابل
د چاپېریال ساتنې ملي ادارې عمومي رئیس حافظ عزیز الرحمن، پالیسي او مسلکي معین ډاکټر
زین العابدین عابد او د دې ادارې تخنیکي ټیم
د ۱۴۰۲کال د ليندۍ په ۵مه نېټه په خپل کاري دفتر کې په افغانستان کې د ملګرو
ملتونو د پراختيايي ادارې له رئیس اسټېفن رودریکز سره د اقلیمي بدلون په برخه کې د
افغانستان د تعليقي پروژو د بیا پیلیدو په تړاو لیدنه وکړه.
په پیل کې د دې ادارې عمومې رئیس د UNDP رئیس او ورسره پلاوي ته ښه راغلاست ووایه او
د مختلفو چاپېریالي موضوعاتو په ځانګړي ډول د اقلیمي بدلون په تړاو یې ورسره هر اړخیزې
خبرې وکړې.
د چاپېریال ساتنې ملي ادارې عمومي رئیس وویل: نړۍوال باید چاپېریالي موضوعات سیاسي
نه کړي ځکه دا بشري موضوعات دي چې ګټه او زیان یې یوازې ولسونو ته رسیږي؛
افغانستان اوسمهال په جدي توګه د اقلیمي بدلون له ناوړه اغېزو څخه متاثر هېواد دی
په داسې حال کې چې د ګلخانهيي ګازونو په خپرولو کې ډیره کمه ونډه لري. نوموړي
وويل چې د اقلیمي بدلون په برخه کې دې د افغانستان ۳۰تعلیقي پروژې چې د نظام په
بدلون سره تعليق شوې دي چې باید بیا پيل شي؛ له دې جملی څخه ۹پروژې د UNDP سره په ګډه تر
کار لاندې وې چې باید بېرته پيل سي.
ښاغلي حافظ وویل اوسمهال په افغانستان کې بشپړ امنیت تامین دی او د کار کولو لپاره
ښه فرصت رامنځته شوی؛ نو له نړۍوالو مو هیله دا ده چې په افغانستان کې خپلې نیمګړې
پروژې بیا پيل کړي.
د چاپېريال ساتنې ملي ادارې عمومي رييس وويل: افغانستان د نړۍوالو چاپېریالي کنواسیونونو
رسمي غړیتوب لري او دا اداره د ټولو کنوانسیونونو تعهداتو ته ژمنه ده؛ نو نړۍوالو
ته هم پکار ده چې له افغانستان سره په کړو تعهداتو عمل وکړي او نېمګړې پروژې بیا پیل
کړي.
نوموړي د UNDP له رئیس وغوښتل چې د نړۍوالو چاپېریالي
اسانتیاوو (GEF) لخوا د افغانستان لپاره ۳۰ دیرش میلیونه ډالر ځانګړي شوي او اوس
د تعلیق په حالت کې دي همدا راز د کوچنیو چاپېریالي پروژو (SGP) په برخه کې هم
۴۰څلویښت میلونه ډالر شته چې UNDP باید په دې برخه کې همکاري وکړي.
په افغانستان کې د ملګرو ملتونو د پراختیایي ادارې رئیس اسټیفن رودریکز د دې ادارې
له عمومي رئیس څخه مننه وکړه او زیاته یې کړه چې هڅه به وکړي چې له افغانستان سره
د نړۍوالو د همکارۍ زمینه مساعده کړي او ډاډ یې ورکړ چې زموږ تخنیکي ټیمونه به د
چاپېریال ساتنې ملي ادارې سره په ګډه کار پیل کړي.
نوموړي وویل: اوس په افغانستان کې بشپړ امنیت تامین دی، مخدره مواد بند شوي چې دا
اسلامي امارت لویې لاسته راوړنې دي. ده وویل: زه یوه وعده کوم چې له پخواني حکومت
سره موږ کومې اړیکې لرلې هغه اړیکې بیا ورغوم.
ښاغلي رودریکز ټینګار وکړ کومې وعدې چې موږ کوو باید عملي یې کړو؛ ځکه د افغانستان
ولس له اقلیمي بدلون څخه زیات اغیزمن شوی.
نوموړي ژمنه وکړه چې موږ تلاش کوو ترڅو نړۍوال له افغانستان سره ښه تعامل وکړي، ده
زیاته کړه: موږ به د نیمګړو چاپېریالي پروژ د بیا پیل لپاره خپلې هڅې کوو او اقلیمي
بدلون سره د مبارزې په برخه کې مو هم ډیر پروپوزلونه چمتو کړي چې د دې ادارې له
تخنیکي همکارانو سره به هم شریک شي ځکه له اقلیمي بدلون سره مبارزه د ټولې نړۍ ګډ کار دی.