د چاپېريال ساتني ملي ادارې پاليسي او مسلکي معين د کندهار صنعتکارانو سره د چاپېریالي ستونزو په هکله لیدنه وکړه

۱۴۴۵کال د رجب۲۳مه/کندهار
د چاپېريال ساتنې ملي ادارې پاليسي او مسلکي معين ډاکتر زين العابدين عابد کندهار ته د رسمي سفر په ترڅ کې د کندهار د صنعت او معدن خونې له رٸيس او يو شمېر صنعت کارانو سره د چاپېریالي ستونزو د حل په موخه وليدل.
په دې ليدنه کې د کندهار ولایت د چاپېريال ساتنې رٸيس مولوي محمديوسف حذيفه او د یاد رياست کارمندانو هم حضور درلود.

د غونډې په پيل کې د کندهار د صنعت او معدن خونې رٸيس سيد سروراغا اماني د چاپېريال ساتنې ملي ادارې معين او ورسره پلاوي ته ښه راغلاست ووايه، وروسته یې د هيواد په ابادۍ کي د صنعتي فعاليتونو د رول په هکله خبري وکړې. ښاغلي اماني وويل چې فعلا  په افغانستان کې شاوخوا ١٠٠ صنعتي سکټورنه فعاليت لري چې په دې برخه کې اوس افغانستان تر ډېره حده پر ځان بسيا شوى دى په ځانګړي ډول د لبنياتو، پنبې، پلاسټيکي مصنوعاتو، سيخ ګول او ګاډر په برخه کې د پرديو له احتياجه خلاص سوى دى.

ښاغلي اماني د برق کمښت، سخت قوانين او مقررات، په جواز اخيستلو کې ستونزې او اداري کاغذپراني، په صنعتي پارک کې د لازمو خدماتو نشتوالى هغه ستونزې يادې کړې چې په کندهار کي یې د صنعتکارانو او پانګوالو فعاليتونه اغېزمن کړي دي او وروسته یې خپل وړانديزونه يو په يو وړاندې کړل.
همدارنګه د پنبې سکټور، خوارکي توکو د توليد سکټور،  شامپو او صابون سکټور، د اوسپنې سکټور په استازیتوب بيلا بيلو صنعتکارانو خپلې ستونزې د چاپېريال ساتنې ملي اداري له پلاوي سره شريکې کړې.
دکندهار ولایت د چاپېريال ساتنې رٸيس مولوي محمديوسف حذيفه د صنعتکارانو يو شمېر انديښنو ته ځواب ووايه او زياته یې کړه چې د کندهار چاپېريال ساتنې رياست بغیر له کوم توپيره د ټولو هغو فعاليتونو اصلاح او معياري کولو ته ژمن دى چې د چاپيريالي اصولو او نورمونو خلاف فعاليت کوي.
ښاغلي حذيفه وويل چې د ټولو صنعتکارانو او عامو خلکو شکايتونو ته یې پر وخت رسيدګي کړې او هغه ستونزي چې په مرکز پوري یې اړه درلودله تر مرکز پورې رسولې دي.

د چاپېريال ساتنې ملي ادارې پاليسي او مسلکي معين ډاکټر زين العابدين عابد خبرې وکړې او د صنعتکارانو ستونزې یې پر ځاى وبللې او ژمنه یې وکړه د حل لپاره به یې جدي ګامونه واخلي. ښاغلي عابد وويل چې د چاپېریال ساتنې ملي ادارې د صنعتکارانو د سهولت او د ځنډ د مخنيوي لپاره د جواز پروسه اسانه او چټکه کړې ده او په دې برخه کې لا نور پلانونه تر کار لاندې لري.
ښاغلي عابد پر صنعتکارانو غږ وکړ چې صنعت کاران بايد د فعاليت د شروع څخه مخکې د چاپيریالي اغېزو ته متوجې شي د توليداتو کيفيت لوړ کړي او خپل فعاليت د چاپيريالي اصولو مطابق عيار کړي؛ ترڅو هيواد مو د راتلونکو چاپېريالي ستونزو او ګواښونو څخه خوندي شي.

Feb 4, 2024