د ګردیز ښار مختلفو اصنافو مالکینو او ګذر وکیلانو ته د چاپېریال ساتنې په هکله عامه پوهاوی ورکړل شو

۱۴۴۵کال د شوال ۸مه/ پکتیا
 د پکتیا ولایت د چاپېریال ساتنې ریاست مسوولینو لخوا تېره ورځ د ګردیز ښار مختلفو اصنافو مالکینو او ګذر وکیلانو ته د چاپېریال ساتنې په هکله د عامه پوهاوي غونډه جوړه شوې وه.
د غونډې په پیل کې د پکتیا ولایت د چاپېریال ساتنې رئیس مولوي عبدالهادي هدایت وینا وکړه، له گردیز ښاریانو څخه یې وغوښتل چې د ښار پاکوالي، د ونو، شنو بوټو ساتنې او سمسورتیا ته پاملرنه وکړي او همدا راز د امیرالمومنین حفظه الله د هدایت مطابق هر افغان دې دوه نیالگي کېنوي، ساتنه او پالنه دې هم وکړي؛ ترڅو چې هم جاریه صدقه شي او هم  پاک چاپیریال او سالم ژوند ولرو او ټولو هیوادوالو ته تازه هوا، پاکې اوبه او پاکه خاوره ولرو.

ښاغلي هدایت د مارکیټونو او لوړپوړیزو ودانیو مالکینو ته سپارښتنه وکړه چې د خپل فعالیت په سیمو کې شنې ساحې ولري.
د گردیز ښاروال هم خلکو ته وینا وکړه او له دوی څخه یې وغوښتل چې اداراتو سره پوره پوره همکاري وکړي، دکاندارانو او ښاریانو ته یې وویل چې د ښار کثافات په کثافت دانیو کې واچوي، نه په لاره او ویالو کې، ښاروال زیاته کړه چې که چیرې یادو مواردو ته توجه وکړو نو کولی شو چې په گډه سره خپل ښار آباد او سمسور کړو.

غونډه کې د گذر وکیلانو، قومي مشرانو او د اصنافو استازو هم ویناوې وکړې او ژمنه یې وکړه چې د چاپېریال ساتنې په برخه کې به له اړوندو امارتي ادارو سره همکاري کوي.

Apr 17, 2024