وروستی
د چاپېریالي چارو مفتشینو د ۲۹فابریکو او تولیدي شرکتونو له فعالیتونو څارنه وکړه
۱۴۴۵کال د ذی الحجې ۲۴مه/ کابل
د چاپېریال ساتنې ملي ادارې مفتشینو د چاپېریالي اصولو د
تطبیق په موخه د کابل څرخي صنعتي پارکونو کې د وسپنې ویلې کولو، وینځونکو توکو،
طبي وسایلو، بخار دیګونو، پلاستیکي او تعمیراتي توکو، پایپونو، المونیمو او مرمر ډبرو
د ۲۹ فابریکو او تولیدي شرکتونو له فعالیتونو څارنه وکړه.
د چاپېریالي چارو مفتشینو د فابریکو او تولیدي شرکتونو مالکینو
ته د چاپېریال قانون، مقرراتو او طرزالعملونو په هکله معلومات او پوهاوی ورکړ او
سپارښتنه یې ورته وکړه چې خپل فعالیتونه د چاپېریالي مقرراتو په نظر کې نیولو سره
عیار او ترسره کړي.
د نظارت په لړ کې د فابریکو او تولیدي شرکتونو مسوولینو ته
موجوده چاپېریالي ستونزې په ګوته شوې او د اصلاح په موخه ترې لیکلې ژمنې واخیستل
شوې.
د چاپېریال ساتنې ملي اداره د هواککړتیا راکمولو او مخنیوي
په موخه د هواککړوونکو سرچینو هر ډول فعالیتونو مسوولینو ته سپارښته کوي چې خپل
فعالیتونه د چاپېریالي اصولو مطابق عیار او ترسره کړي.
هغه فابریکې او تولیدي شرکتونه چې د دود د تصفیې فلټرونه یې
غیر فعال، ویجاړ او یا هم د اوبو، هوا او خاورې د ککړتیا لامل وګرځي، له قانوني
چلند سره به مخ شي.
د یادونې وړ ده چې د چاپېریال ساتنې ملي ادارې نظارتي ټیمونه
په مرکز او ولایتونو کې د هواککړوونکو سرچینو څخه په دوامداره توګه څارنه کوي او
هغه څوک چې له چاپېریالي اصولو څخه سرغړونه کوي د قانون منګولو ته یې سپاري.