په ټول هېواد کې د وحشي ژوو ښکار، د ځنګلونو او طبي بوټو وهل منع دي

۱۴۴۶کال د محرم ۴مه/ کندهار
د کندهار ولایت د چاپېريال ساتنې رياست مسوولینو د پنجوايي ولسوالۍ اړوند د ډورۍ رود د ځنګلونو او د خروټو بند په غرنۍ ساحه کې د وحشي ژوو د چاپېریالي وضعيت څخه نظارت وکړ.

پنجوايي د کندهار يوه پراخه سرسبزه او نيمه دښتي ولسوالي ده چې د ارغنداب او ډورۍ سيندونو په منځ کې پرته ده د غرونو مختلفې لړۍ او پراخې دښتې لري چې د بيلا بيلو غرنيو او دښتي وحشي ژوو، خزندو، آبي او دښتي مرغانو د اوسيدو ځاى دى.
د چاپېریالي چارو مفتشینو د پنجوايي ولسوالۍ د ځنګلي، غرنيو سيمو او د خروټو بند د غرنۍ سيمې څخه نظارت وکړ د يادې سيمې د اوسيدونکو د معلوماتو له مخې په ياده غرنۍ ساحه کې وحشي څيرونکي ژوي، مختلف النوعه الوتونکي او خزندې پيدا کيږي.

په هېواد کې د تېرو څو لسیزو جګړو او ناقانونه ښکار له امله د يادو سيمو د وحشي حيواناتو په شمېر کې د پام وړ کمښت راغلى وو؛ خو اوس په افغانستان کې د ناقانونه ښکار په بنديدو او د جګرو د ټغر په ټوليدو سره وحشي حيواناتو او مرغانو په شمير کې هم ډېروالى راغلى دى.
د خروټو بند سيمې اوسيدونکو ته د وحشي ژوو او مرغانو د چاپېريالي ارزښت، د ناقانونه ښکار د مخنيوى اړوند د رياست الوزرا عالي مقام د حکم په هکله عامه پوهاوى ورکړل شو.
د سيمې اوسيدونکو د ښکار په بنديدو خوښي ښکاره کړه او په دې برخه کې یې د اړوندو ادارو او امنيتي ارګانونو سره د همکارۍ ډاډ ورکړ.

همدارنګه د پنجوايي ولسوالۍ اړوند د ډورۍ سيند د دواړو غاړو د موجوده ځنګلونو څخه نظارت وشو چې د ځنګلي او دښتي بوټو د قطعه کولو په مخنيوي سره د دې سيمې ځنګلي بوټو وده کړې او د بشري فعاليت په کميدو سره په ځنګله کې وحشي حيوانات، اوبيز مرغان او نادر خزنده‌ګان ډير شوي دي.
د پنجوايي ولسوالۍ د امنيتي مسٶلينو په همکارۍ د ډورۍ سيند د ځنګلي بوټو د قطعه کولو مخنيوی شوى چې د ځنګلونو او وحشي ژوو په وضعيت کې د پام وړ ښه والى راغلى چې په دې برخه کې د سيمه یيزو مجاهدينو د هلوځلو څخه مننه وشوه او د وحشي ژوو، مرغانو او ځنګلي بوټو د ساتنې او ارزښت په هکله لا نور پوهاوی ورکړل شو.l

Jul 10, 2024