مطبوعاتي اعلامیه

۱۴۴۶ق کال د محرم ۱۰مه
له بده مرغه تېره ورځ د روان ۱۴۰۳هـ ش کال د چنګاښ په ۲۵مه نېټه په ننګرهار ولایت او د هېواد په ځینو نورو ولایتونو کې د شدیدو سېلابونو او طوفانونو له امله زموږ ګڼ شمېر هېوادوال ټپیان او شهیدان شوي دي!
 إِنَّا لِلَّهِ وَإِنَّا إِلَيْهِ رَاجِعُونَ ﴿۱۵۶﴾ الله تعالی دې شهیدانو ته جنت الفردوس او ټپیانو ته عاجله او کامله شفا ورکړي. دا زموږ ټولو مشترک درد دی او په دې غم کې ځان شریک بولو.
قدرمنو هېوادوالو!
اقلیمي بدلون اوسمهال یوه نړیواله او سیمه ییزه ننګونه ده، چې د ایکوسیستم ثبات یې ګډوډ کړی او د ټولنې د ژوند ټول اړخونه یې له ګواښ سره مخ کړي دي چې په پایله کې د اقتصاد او د خلکو د ژوندانه د فشار لامل شوی دی.
سره له دې چې افغانستان د اقلیمي بدلون او ګلخانه يي ګازونو په خپرولو کې ډیر کم رول لري؛ خو د اقلیمي بدلون له ناوړه اغېزو څخه ډیر زیات اغېزمن هېواد دی.  په دې وروستيو کې په هېواد کې شدید سېلابونه، طوفانونه او سخت ورښتونه د اقليمي بدلون د ناوړه اغېزو ژوندۍ بېلګې دي.
د اقلیمي بدلون له امله له نړیوالو ننګونو سره مقابله د حکومتونو ګډ کار ته اړتیا لري. د اقلیمي بدلون په اړه د ملګرو ملتونو د کنوانسیون د غړو د مسؤلیتونو او مکلفیتونو له مخې پرمختللی هیوادونه چې د دویمې ضمیمې په ډله کې شامل دي،  مکلف دي چې کم ودې هېوادونو ته مالي سرچینې او له اقلیمي بدلون سره سازګاره ټیکنالوژي چمتو کړي؛ ترڅو د اقلیم بدلون سره سازښت وکړي.
صنعتي او پرمختللي هیوادونه د ګلخانه یي ګازونو د اخراج تاریخي تمایل او د دوی بشپړ اقتصادي ودې په پام کې نیولو سره اړ دي چې د هغو ټولنو چاپیریالي حقونو ته درناوی وکړي چې د اقلیم د بدلون او د اقلیم عدالت اغیزو ته زیان رسوي.
د چاپېریال ساتنې ملي اداره د خپلو کاري مسوولیتونو له مخې د ملګرو ملتونو د اقلیمي بدلون کنوانسیون او د پاریس تړون د موخو او مکلفیتونو پلي کولو ته ژمنه ده اوسمهال افغانستان له تخنیکي او مالي مرستو د ترلاسه کولو پرته د چاپیریالي کنوانسیونونو او پروتوکولونو اهداف پلي کوي؛ که څه هم د افغانستان اسلامي امارت د اوبو د مدیریت، کرنې، ځنګلونو، انرژۍ او ژوند بڼو په برخو کې د اقلیمي بدلون د اغیزو په وړاندې د انعطاف د زیاتولو په موخه د ملي بودیجې له لارې ګڼې پروژې لري؛ خو د چاپېریالي حقوقو او د اقلیم عدالت د تامین له مخې باید د اقلیمي بدلون په برخه کې د افغانستان ځنډول شوې پروژې ژر تر ژره بیا پیل شي او د دې سربېره باید افغانستان د نوي تاسیس شوي صندوق په شمول د اقلیمي بدلون په برخه کې ټولو مالي میکانیزمونو او سرچینو ته لاسرسی ومومي؛ همدا راز موږ تمه لرو چې افغان پلاوي ته د اقلیمي بدلون اړوند سیمه ییزو او نړیوالو غونډو کې د ګډون بلنه ورکړل شي؛ ترڅو د اقلیمي بدلون او چاپېریالي ستونزو په تړاو خپل غږ تر نړۍوالو ورسوي.

والسلام

د چاپېریال ساتنې ملي اداره

Jul 16, 2024