وروستی
د چاپېریال ساتنې ملي ادارې عمومي رئیس او د ملګرو ملتونو د پراختیایي پروګرام رئیس لیدنه؛ افغانستان کې د اقلیمي بدلون پر موضوعاتو خبرې وشوې
۱۴۴۶کال
د محرم۲۲مه/ کابل
د چاپېریال ساتنې
ملي ادارې عمومي رئیس مولوي مطیع الحق خالص نن یک شنبه د ۱۴۰۳کال د اسد په ۷مه نېټه خپل کاري دفتر کې د ملګرو
ملتونو د پراختیایې پروګرام (UNDP)له رئیس ښاغلي سټیفن سره وکتل؛ په دې لیدنه
کې د اقلیمي بدلون په تړاو مختلفو مسایلو او چاپېریالي پروژو په هکله هر اړخیزې
خبرې وشوې.
په پیل کې د چاپېریال
ساتنې ملي ادارې عمومي رئیس د (UNDP) مسوول او ورسره پلاوي هرکلی وکړ او پر ګډه همکارۍ او تعامل يې ټینګار
وکړ. نوموړي وویل: له بده مرغه اوسمهال نړۍوالو بشري مسایل له سیاست سره تړلي دي
چې دا د بشر په ګټه نه دي. ده زیاته کړه موږ هیله لرو چې بشري موضوعات سیاسي نه شي.
ښاغلي خالص وویل:
دا مهال د افغانستان خلک، حیوانات او نباتات د اقلیمي بدلون د ناوړه اغېزو څخه زیات
اغېزمن شوي دي او په دې برخه کي مشترکو اقداماتوته اړتیا لیدل کیږي؛ نوموړي زياته
کړه زموږ توقع همدا ده چې رغنده او مثبت ګامونه واخلو.
د ملګرو ملتونو
د پراختیايي پروګرام رئيس په خپلو خبرو کې وویل موږ پخوا هم د چاپېریال ساتنې ملي
ادارې له مشرتابه سره د چاپېریالي موضوعاتو په هکله بېلا بیلې ناستې کړي دي او دا
پروسه به دوام ولري.
د غونډې په لړ کې
د دې ادارې د اقلیمي بدلون رئیس د دوو چاپېریالي پروژو، چاپېریالي سندونو او په
ولایتونو کې د څېړنیزو چاپېریالي فارمونو جوړولو په هکله معلومات ورکړل او په دې
برخه کې یې د
(UNDP) همکاري
اړینه وبلله.
د (UNDP) رئیس د همکارۍ ډاډ ورکړ او ویې ویل: سیاست،
اقلیم او خلک باید سره ګډ نه شي او زه په دې موافق یم چې خلک د سیاست قرباني نه شي.
ښاغلي سټیفن وویل
هڅه به وکړي هغه هېوادونه چې د اقلیمي بدلون په برخه کې د افغانستان د پروژو د ځنډ
او خنډ لامل دي، پر دې قانع کړي چې د چاپېریالي ګواښونو اصلي قربانیان غریب خلک دي.
ده ژمنه وکړه چې
د اقلیمي بدلون په برخه کې مالي میکانیزمونو ته د افغانستان د لاسرسي او د COP 29 نړۍوال کنفرانس کې د افغانستان د حکومت
استازو ته د ګډون په برخه کې به خپلو هڅو او کوښښونو ته دوام ورکړي.