وروستی
د هرات ولایت د صنعت کارانو له اتحادیې سره د چاپېریال ساتنې ملي ادارې مسلکي معین لیدنه
د چاپېریال ساتنې ملي ادارې مسلکي معین، انجنیر عزت الله صدیقي د تلې په ۶مه نېټه د هرات ولایت د سوداګرۍ او صنعتي خونو له مسولینو سره ولیدل.
لومړی د دغه ولایت ملي سوداګرو د چاپېریالي جوازونو د تر لاسه کولو په اړه یو لړ پېچلو شته ستونزو ته ګوته ونیوه او یادونه يې وکړه چې د یادو ستونزو پر اساس دې د جوازونو پروسه ولایتي ریاستونو ته ولېږدول شي.
ملي سوداګرو ټینګار وکړ چې د سوداګرۍ په پرمختګ او پانګې اچونې سره کېدای شي د ښه چاپېریال خاوندان شو او همدارنګه د بې وزلۍ او بېکارۍ د له منځه تللو سبب شي.
د هرات ولایت ملي سوداګرو د صنعتي ښارګوټو د سړکونو د پخېدو، د زرغون چاپېریال په برخه کې د لارښوونو او همدا رنګه د ښارګوټو اړوند کاناليزاسيون سیستم پر تطبیق باندې ټنګار وکړ.
ښاغلي صدیقي د سوداګرو له نظریاتو اورېدو وروسته د سوداګريزو فعاليتونو د ترسره کولو په پار د شته چاپېريال ساتنې اړوند قوانينو او کړنلارو په اړه ټينګار وکړ.
مسلکي معين ولايتي رياستونو ته د جواز ورکونې د ځينو صلاحيتونو د لېږد اړوند د پروژو او برنامو ډلبندي د هېواد د سوداګرۍ د ودې لپاره يو اساسي او حياتي امر وګاڼه.