وروستی
د دود کوونکو موټرونو د توقف په تړاو لومړنۍ مشورتي غونډه ترسره شوه
۱۴۴۶کال د ربیع الاول ۷مه/ کابل
د چاپېریال ساتنې ملي ادارې له خوا د هېواد په لویو ښارونو خصوصاً کابل ښار کې د
هواککړتیا راکمولو او مخنیوي په موخه د دې ادارې د نظارت او تفتیش رئیس مولوي احمد
فیصل بریالي په مشرۍ نن د ۱۴۰۳کال د وږي په ۲۰مه نېټه د دې ادارې د بند امیر غونډو
په تالار کې د ښکېلو ادارو د باصلاحیته استازو په ګډون د هېواد په لویو ښارونو کې
دود کوونکو موټرونو د فعالیت د مخنیوي په تړاو لومړنۍ مشورتي غونډه ترسره شوه.
په دې غونډه کې د ټرانسپورټ وزارت، سټندرد ملي ادارې، ترافیکو عمومي ریاست او کابل
ښاروالۍ باصلاحیته استازو ګډون کړی وو.
غونډه د قرانکریم مبارکو ایتونو په تلاوت پیل شوه ورپسې د دې ادارې د نظارت او تفتیش
رئیس ګډونوالو ته ښه راغلاست ووایه او په احسنه توګه د کارونو د ترسره کولو لپاره یې
د داسې مشورتي غونډو جوړول اړین او ګټور وبلل.
نوموړي په خپلو خبرو کې یې وویل: د چاپېریال ساتنې ملي ادارې نظارتي ټیم د اړوندو
ادارو د استازو په ګډون د هواککړتیا راکمولو او مخنیوي په موخه تېره اونۍ د کابل ښار
په ګڼمېشتو سیمو کې د دود کوونکو موټرونو د درولو کمپاین پیل کړ چې ډیرو هېوادوالو
یې هرکلی وکړ.
په یاده غونډه کې د هواککړتیا د راکمولو سربېره د غږیزې ککړتیا د مخنیوي په موخه د
دود کوونکو موټرونو د توقف، د غږ لرونکو سلنسرونو، لیزري څراغونو او غیر مجاز
هارنونو؛ په مرکز او ولایتونو کې د نقلیه وسایطو د تخنیکي معایناتو د چک مرکزونو د
جوړولو او څرنګوالي؛ د دود کوونکو موټرونو د چک پاینټونو څخه دوامداره نظارت او په
کابل ښار کې د ښاري موټرونو لپاره د تمځایونو د جوړولو په تړاو هر اړخیز بحث او
لاندې پریکړې وشوې:
- د اړوندو ادارو د استازو جوړ شوي ګډ پلاوي له خوا باید د کابل ښار په ګڼمېشتو
سیمو کې د ترافیکو محترم ریاست له لوري د دود کوونکو موټرو د توقف په موخه جوړو
شوو چک پاینټونو څخه په میاشت کې دوه ځله باید نظارت ترسره شي.
- د غږیزې ککړتیا د راکمولو او مخنیوي لپاره جدي تدابیر ونیول شي؛ ترڅو په ښارونو
کې د لوړ غږ لرونکو سلنسرونو، لیزري څراغونو او غیر مجاز هارنونو مخنیوی وشي.
- ټولو امارتي ادارو ته باید د ذکر شوو مواردو په هکله رسمي مکتوبونه ور و استول
شي؛ ترڅو د چاپېریال اصولو د تطبیق په برخه کې هر اړخیزه همغږي او همکاري رامنځته
شي.
د یادونې وړ ده چې د کابل ښار په مختلفو ګڼمېشتو سیمو کې د ټرافیکو ریاست له لوري
د دود کوونکو موټرونو د درولو په موخه نظارتي چکپاینټونه جوړ شوي دي او هر ورځ په
لسګونو دود کوونکي موټرونه دروي، له مالکینو څخه یې د موټرونو اسناد او لایسنسونه
اخلي او تر هغه یې نه ورکوي؛ ترڅو یې چې خپل وسایط نه وي ترمیم کړي.