وروستی
په ټول افغانستان کې ښکار بند دی؛ سرغړوونکي د قانون منګولو ته سپارل کیږي
۱۴۴۶کال د ربیع الاول۹مه/ سمنګان-ارزګان-پکتیکا
د ریاست الوزرا عالي مقام حکم په اساس په ټول افغانستان کې
د وحشي ژوو، مارغانو او کبانو ښکار بند دی، په همدې موخه د سمنګانو ولایت د چاپېریال
ساتنې ریاست مفتشینو د دو آب ولسوالۍ امنیتي مسوولینو په همکارۍ څلور تنه ښکاریان
د ښکار له وسایلو او ۲۰
الوتونکو سره نیولي؛ د یاد ریاست د مفتشینو لخوا نیول شوي مرغان چې ۱۶یې بادوړي (بادخورک) او ۴کفترې وې، بېرته ازاد طبیعت
ته خوشې شول.
د پکتیکا ولایت مرکز ښرنه کې هم دوه تنه ښکاریان ونیول شول
چې د مرکز اړوند بندي سردې ساحه کې یې هیلۍ ښکار کړې وې او غوښتل یې چې ښرنې ښار
ته يې انتقال کړي چې د چاپېریال ساتنې رئیس مولوي محمدسجاد وقاص لخوا مخکې له دې چې
ښار ته داخل شي د ښکار له وسایلو سره لاس په لاس ونیول شول چې وسایل یې قید او ښکاریان
د امنیه قومندانۍ مسوولینو ته وسپارل شول.
همداراز د ارزګان ولایت د چاپېريال ساتنې ریاست مسوولینو له
لوري د ښکار د مخنيوي په موخه د ترينکوټ ښار د ګنج څخه نظارت ترسره شو او د ګنج
بازار ټولو هټۍوالو ته د ښکار د مخنیوي په هکله لازمې سپارښتنې او عامه پوهاوی ورکړل
شو.
د یادونې وړ ده چې په افغانستان کې د تېرو څو لسیزو جګړو پر
مهال د انساني ناخوالو سربېره د دې هېواد وحشي ډولونو ته هم ډیر زیان اووښتی چې دا
مهال ۱۴۹وحشي
ډولونه د افغانستان د ساتنې وړ وحشي ډولونو په نوملړ کې شامل شوي دي چې نسل یې د
ورکېدا له ګواښ سره مخ دی.
په دې وحشي ډولونو کې ۸ډوله نباتات، ۱ډول حشره، ۴ډوله خزندهګان، ۱ډول ذوحیاتین، ۵۷ډوله الوتونکي، ۷۶ډوله تيلرونکي ژوي او ۲ډوله کبان شامل دي.
د ا.ا.ا. د مشرتابه د حکم په اساس په ټول افغانستان کې د
ذکر شوو ډولونو ښکار او قاچاق په مطلق ډول بند دی؛ که هر څوک دې امر څخه سرغړونه
وکړي د قانون منګولو ته سپارل کيږي.