د البیروني کلینیک او ویلنس فارما د پمپرونو تولیدي فابریکې د چاپېریالي وضعیت ارزونه وشوه

۱۴۴۶کال د ربیع الاول۲۷مه/ پروان
د طبي زبالو د تفکیک، تنظیم، مدیریت او چاپېریالي اصولو د تطبیق په موخه د پروان ولایت د چاپېریال ساتنې رئیس حفیظ الله منصور په مشرۍ نظارتي ټیمونو له لوري د البیروني کلینیک او همدا راز د ویلنس فارما د ماشومانو د پمپرونو تولیدي فابریکې د ټولو څانګو د چاپېریالي وضعیت څارنه او ارزونه ترسره شوه.
د نظارت په لړ کې د چاپېریالي چارو مفتشینو لخوا د یادو فعالیتونو مسوولینو ته د چاپېریال قانون او مقرراتو په هکله معلومات او پوهاوی ورکړل شو، موجوده چاپېریالي ستونزې ورته په ګوته شوې او سپارښتنې ورته شوې چې طبي زبالې له عادي زبالو څخه تفکیک او په ټاکل شوو ځایونو کې له منځه یووړل شي؛ همدا راز سپارښتنې ورته وشوې چې خپل فعالیتونه د روغتیایي قوانینو او چاپېریالي اصولو مطابق عیار او ترسره کړي.
د چاپېریال ساتنې ملي ادارې مفتشین په مرکز او ولایتونو کې له هر ډول فعالیتونو څارنه کوي او هر هغه څوک چې چاپېریالي اصول نه مراعتوي او همدا راز چاپېریال ساتنې ته پاملرنه نه کوي؛ د قانون منګولو ته سپارل کیږي.

Sep 30, 2024