ستر او کوچني فعالیتونه د چاپېریالي اصولو پر تطبیق مکلف دي

۱۴۴۶کال د ربیع الاول۳۰مه/ کندهار-میدان وردګ-لغمان
د کندهار، میدان وردګو او لغمان ولایتونو د چاپېریال ساتنې ریاستونو نظارتي ټیمونو له لوري د هواککړتیا راکمولو او مخنیوي په موخه د کندهار په صنعتي پارک کې د ۷مختلفو تولیدي او صنعتي فابریکو؛ میدان ښار کې د اکسیجن تولیدي شرکت او د یلدا په نوم د مکرونیو جوړولو تولیدي کارخونې او همدا راز په لغمان کې د نصیب معروف په نوم د ډبرو استخراج معدن د فعالیتونو د څرنګوالي او چاپېریالي او ټولنیزو اغېزو ارزونه ترسره شوه.
د چاپېریالي چارو مفتشینو لخوا د ذکر شوو فعالیتونو مسولینو ته د اوبو، هوا او خاورې ککړتیا د مخنیوي لپاره د لازمو تدابیرو سپارښتنې وشوې؛ د چاپېریال قانون او مقرراتو په هکله عامه پوهاوی ورکړل شو؛ موجوده چاپېریالي ستونزې ورته د اصلاح په موخه ور وښودل شوې او سپارښتنې ورته وشوې چې خپل فعالیتونه د چاپېریالي اصولو مطابق عیار او ترسره کړي.

د چاپېریال قانون د احکامو مطابق د هر ډول فعالیتونو مالکین مکلف دي چې د هېوادوالو روغتیا ساتنې او پاک چاپېریال رامنځته کولو کې خپل مسوولیت ادا کړي او که هر چا سرغړونه وکړه چې جدي قانوني چلند سره به مخ شي.

Oct 3, 2024