د اقليم بدلون او چاپېريال ساتنې په هکله له علمای کرامو سره يو ورځنی سيمنيار ترسره شو

۱۴۴۶کال د جمادي الثاني ٦مه/ کابل
د چاپېریال ساتنې ملي ادارې د (رها) مؤسسې په همکارۍ نن د ۱۴۰۳کال د ليندۍ په ۱۸مه نېټه په صافي لنډ مارک هوټل کې د اقلیمي بدلون  او چاپېريال ساتنې په هکله یو ورځنی سيمينار ترسره کړ.
په دې سيمنار کې د چاپيريال ساتنې ملي ادارې، حج او اوقافو وزارت رهبرۍ، د رها مؤسسې مسوولينو، علمای کرامو، رئیسانو او متخصصينو ګډون کړی وو.

سيمینار د قرانکريم مبارکو آيتونو په تلاوت پيل ورپسې د رها موسسې رئيس محمد يوسف حميديان ټولو ګډونوالو ته ښه راغلاست ووايه او د اقليمي بدلون او د خلکو د ونډې په اړه يې معلومات وړاندې کړل.
نوموړی له علمای کرامو څخه غوښته وکړه چې د اقليمي بدلون په اړه په ننې سيمينار کې تخنیکي معلومات په ښه شکل ترلاسه او خلکو ته ورسوي ترڅو په ګډه له اقليمي بدلون سره مبارزه وکړو.
د چاپېريال ساتنې ملي ادارې مالي او ادارې چارو معين مولوي سعد الدين سعيد د اسلام مبارک دین له نظره د اقليمي بدلون په تړاو هر اړخيزه وينا وکړه او اقلیمي بدلون یې يوه نړیواله موضوع وبلله، ده وويل: د ټولنې ټول وګړي د اقلیمي بدلون په رامنځته کېدو کې ښکیل دي او اړتیا ده چې ټول په ګډه له اقلیمي بدلون سره د سازښت او مبارزې په برخه کې جدي اقدامات ترسره کړو.

ښاغلي سعيد وويل: پاکوالی او د ونو کينول په اسلام کې ځانګړي ارزښت لري او همدا پاکوالی او د ونو کينول د چاپېريال ساتنې او د اقليمي بدلون سره د مبارزې سبب ګرځي.
ښاغلي سعید له علمای کرامو څخه غوښتنه وکړه چې د خپل منبر له لارې خلک چاپېريال ساتنې ته وهڅوي؛ تر څو د اقليمي بدلون د ناوړه اغېزو ښکار نشو او پاک او سالم چاپېريال ولرو.
د حج او اوقافو وزارت د مساجدو عمومي رئیس مولوي محمد اشرف حقاني او د چاپېریال ساتني ملي ادارې  د دعوت او ارشاد رئیس مولوي هدایت الله فتاحي هم د اسلام له نظره د چاپېریال ساتنې د ارزښت او اقلیمي بدلون په هکله بشپړ معلومات ورکړل.

د غونډې په لړ کې د رها موسسې مرستیال انجنیر عزت الله صدیقي لخوا د الميزان نړيوال سند په هکله هر اړخیز معلوماتي پرزنټېشن وړاندې شو، ورپسې د دې ادارې د اقلیمي بدلون رياست کارپوه نجیب الرحمن سعيد د افغانستان د چاپېريالي او اقليمي وضعیت په اړه له ګډونوالو سره معلومات شریک کړه.
د غونډې په پای کې ګډونوالو ګروپي کار  وکړ او دا ډول غونډې یې مهمې وبللې، علمای کرامو ژمنه وکړه چې خلکو ته به د منبرونو له لارې عامه پوهاوی ورکوي او ټینګار یې وکړ د علماوو او اړوندو ادارو تر منځ همغږي لا پیاوړې او خلک چاپېریال ساتنې او اقليمي بدلون ته وهڅول شي.

Dec 9, 2024