وروستی
د اطلاعاتو او فرهنګ، حج او اوقافو وزارتونو او عزيزي بانک سره چاپېریالي هوکړهلیکونه لاسليک شول
د چاپېريال ساتنې ملي ادارې د خلکو د عامه پوهاوي لوړولو او چاپېريالي تبليغاتو په موخه د روان کال د لړم په ۱۲مه نېټه د مطبوعاتي کنفرانس په ترڅ کې د حج او اوقافو او اطلاعاتو او فرهنګ وزارتونو او عزيزي بانک سره د ګډې همکارۍ په تړاو، د حکومت د اطلاعاتو او رسنيو په مرکز کې، هوکړه لیکونه لاسليک کړل.
په دغه کنفرانس کې د چاپېريال ساتنې ملي ادارې مسلکي معين، انجنیر عزت الله صديقي، د اطلاعاتو او فرهنګ وزارت معين سيد فضل آقا سانچارکي، د حج او اوقافو وزارت معين تاج محمد مجاهد او د عزيزي بانک رئيس محمد سالم امید او د یادو ادارو رئیسانو ګډون کړی وو.
ښاغلي صديقي د عامه پوهاوي د کچې په لوړېدو او په چاپېريالي تبليغاتو کې د دولتي او غير دولتي بنسټونو، مدني ټولنو، علمای کرامو، روحانيونو او خصوصي سکتور دخيلېدو کې د دې هوکړه لیکونو لاسليکېدل اغېزمن وبلل او ويې ويل: د هوا ککړتيا د راکمولو او مخنيوي، د ژوندبڼو د ارزښت او ساتنې، له ښکار څخه مخنيوی او د اقليميبدلون سره د سازښت لپاره اړتيا ده چې په ګډه کار وکړو.
مسلکي معين ټينګار وکړ چې په چاپېريالي موضوعاتو کې د عامه پوهاوي کموالی يوه جدي ستونزه ده او په دې برخه کې د ټولو دولتي او خصوصي ادارو ګډون او برخه اخېستلو موخه د خلکو د عامه پوهاوي لوړول دي؛ نو د لا ډېرې همغږۍ او د دې همکاريو د قانوني کېدو په موخه موږ نن دا هوکړه ليکونه د اطلاعاتو او فرهنګ، حج او اوقافو وزارتونو او عزيزي بانک سره لاسليک کړل.
ورپسې د اطلاعاتو او فرهنګ وزارت د نشراتو معين فاضل آقا سانچارکي د هوکړه لیکونو د لاسليکولو پر مهال وويل: د خصوصي رسنيو د مقررې پر اساس، رسنۍ مکلفې دي چې د خپلو خپرونو يوه برخه مهمو ملي موضوعاتو ته ځانګړې کړي. موږ به د اطلاعاتو د مسوول په توګه د چاپېريال ساتنې اړوند موضوعات د دولتي رسنيو له لارې د خصوصي رسنيو سره په همغږۍ په ۳۴ ولايتونو کې خپاره کړو.
د حج او اوقافو وزارت معين تاج محمد مجاهد ژمنه وکړه چې د علمای کرامو، د جوماتونو او تکایایو ملاامامانو او خطیبانو په همکارۍ به د برنامو او تبليغونو له لارې د چاپېريال ساتنې اړوند موضوعات خلکو ته ور ورسوو.
د عزيزي بانک رئيس محمد سالم اميد وويل: موږ په تېرو پنځو کلونو کې د چاپېريال ساتنې په موخه برنامې لرلې او يو ځلې بيا ژمنه کوو چې د چاپېريال ساتنې په تړاو به د خلکو عامه پوهاوي لوړولو ته د چاپېريال ساتنې ملي ادارې په همغږۍ ځانګړې پاملرنه کوو.
د کنفرانس په پای کې ښاغلي صديقي د خبريالانو پوښتنو ته هر اړخیز ځوابونه ورکړل.