وروستی
په بنګله دیش کې د سویلي آسیا د چاپیریالي همکاریوسازمان د مشرتابه پلاوي، ۱۵مه غونډه ترسره شوه
د چاپېریال ساتنې ملي ادارې د نړیوالو اړیکو او پالیسۍ معین، ادریس ملیار په مشرۍ، د روان کال د لړم په ۱۲مه نېټه د سویلي آسیا د چاپیریالي همکاریو سازمان ۱۵مه غونډه د بنګله دیش په ډاکه ښار کې ترسره شوه چې پکې د غړیو هېوادونو استازو ګډون کړی وو.
دغه سازمان په 1982 کال کې په سیمه کې د چاپېریالي چارو د مدیریت او چاپېریال ساتنې په موخه جوړ شوی دی.
ښاغلي میلیار د بنګله دیش حکومت څخه د غونډې د کوربه توب له امله مننه وکړه او ویې ویل چې له هغه وخت نه چې افغانستان د دې سازمان مشري کوي، د چاپیریالي ستونزو د حلولو په برخه کې د پام وړ بدلونونه راغلي دي. نوموړي زیاته کړه: موږ پوهیږو چې د چاپېریالي ستونزو د حل لپاره د مختلفو اړخونو مدیریت کول او دوامدار پرمختګ له ځانګړي اهمیت څخه برخمن دی.
ښاغلي ملیار وویل: کله چې موږ په د هرې طبقې خلکو په ژوندانه باندې د چاپېریال د ویجاړتیا اغیزې وګورو؛ نو وینو چې د هوا او اوبو د ککړتیا مختلف شکلونه د دې لامل ګرځي چې ورو ورو خلک او طبیعي ایکوسیستم له منځه وړي. ده وویل: په داسې حال کې افغانستان د دې سازمان مشري د بنګله دیش هېواد ته سپاري چې موږ د چاپېریالي ستونزو او ګواښونو د حل لپاره په سیمه ییزه کچه سیاسي او ټولنیزه ژمنتیا لرو؛ ترڅو هغه څه ترلاسه کړو چې موږ یې غواړو.
دغه غونډه د روان کال د لړم له ۱۲مې نېټې څخه پیل او تر ۱۵مې نېټې پورې به دوام ولري او ښاغلی ملیار به د غونډې په لړ کې د سیمه ییزو او نړیوالو همکارانو سره ناستې ولري او د عقرب په ۱۵مه نېټه به د سویلي آسیا غړیو هېوادونو د چاپېریال ساتنې وزیرانو په غونډه کې ګډون وکړي.
د یادولو وړ ده چې د چاپېریالي همکاریو په سازمان (SACEP) کې اته هېوادونه: افغانستان، بنګله دیش، بوتان، پاکستان، سریلنکا، نیپال، مالدیف او هندوستان غړیتوب لري.