وروستی
هلمند پوهنتون کې د زرګونو نیالګیو په ایښودلو سره د نیالګیو کېنولو لړۍ پیل شوه
۱۴۴۶کال د رمضان المبارک ۱۰مه/ لښکرګاه
د هلمند ولایت د چاپېريال ساتنې رياست له لوري په هلمند
پوهنتون کې د ۳۳۰۰
نيالګيو په اېښودلو سره د يو لړ مراسمو په ترڅ کې د نیالګیو کېنولو ملي برنامه پیل شوه.
په دې مراسمو کې د هلمند ولايت مقام د دفتر رئيس الحاج
مولوي عبدالرحمن حذيفه، چاپېريال ساتنې رئيس الحاج ملا محمد عيسی حسین الله آغا،
هلمند پوهنتون رئيس الحاج شیخ الحدیث مفتي شریف الله ابواحمد، لښکرګاه ښاروالۍ او
يو شمېر ادارو استازو ګډون کړی وو.
د نیالګیو ايښودلو مراسم د قرآنکریم د څو مبارکو آيتونو په
تلاوت پیل شول ورپسې د هلمند ولایت د چاپیریال ساتنې رئیس حسين الله آغا وويل: چاپېریال
ساتنې رياست هڅه کوي ترڅو د مرکز لښکرګاه ترڅنګ په يو شمېر ولسوالیو کې سږ کال په
زرګونه مثمر او غير مثمر نيالګي کېنوي ترڅو د چاپيريال د پاکوالي او ښېرازۍ لامل وګرځي.
نوموړي زياته کړه چې د نيالګيو اېښودلو لړۍ مخکې پيل شوې چې
په دوام يې نن د همدې مراسمو پر مهال د ۳۳۰۰ نيالګيو اېښودلو لړۍ پيلوو چې دا نيالګي به د
هلمند پوهنتون ترڅنګ په يو شمېر ښوونځيو او تعليمي مرکزونو کې کېنول شي.
د ولایت مقام د دفتر رئیس ښاغلي حذيفه د ساينسي پلوه د ونو
پر ارزښت خبرې وکړې او ويې ويل: د نړۍ د ټکنالوژيکي چټک پرمختګ سره د نړۍ د ټولو هېوادونو
چاپيريال ته زيان اوښتی او بېلا بېلي ناروغۍ يې رامنځته کړي نو پکار ده چې موږ يې
پر وړاندي اړين تدابير ونيسو او د هوا د پاکوالي لپاره زيات نيالګي کېنوو.
نوموړي همدارنګه زياته کړه چې ونې او زرغون چاپېريال د
انسانانو په ژوند کې مهم رول لري ځکه يوه ونه د شاوخوا نهو انسانانو لپاره اکسېجن
توليدوي نو پکار ده چې د ټولنې هر وکړی يې اېښودلو او ساتنې ته پاملرنه وکړي.
همدارنګه د هلمند پوهنتون رئیس ښاغلي ابواحمد په اسلام کې د
چاپېريال پر ساتنې او پاکوالي د فضيلت او ارزښت په اړه عالمانه خبرې وکړې او ویې
ويل: ټول انسانان په دې باندې مسؤل دي چې خپل چاپېريال پاک وساتي ځکه پاک چاپيريال
د الله تعالی له لوري يو نعمت دی او څوک چې د چاپېريال په ککړتيا کې لاس ولري هغه
د الله پر بندګانو دغه نعمت بند کړ او د يوې لويي ګناه مرتکب کڼل کيږي.
هلمند پوهنتون رئيس همدارنګه زياته کړه کله چې يو کس يوه
ونه کېنوي دا صدقه جاريه ده چې ترڅو دغه ونه شنه وي صدقه به یې ورته روانه وي نو د
ټولو هېوادوالو څخه غواړو چې د نيالګيو د کېنولو ترڅنګ يې پوره ساتنه او
پاملرنه هم وکړي.