پکتیکا کې د نیالګیو کېنولو ملي کمپاین پیل شو

۱۴۴۶کال د رمضان المبارک ۱۸مه/ پکتیکا
د پکتیکا ولایت د چاپېریال ساتنې ریاست په مشرۍ، کرنې اوبو لګولو او مالدارۍ ریاست، ښرنې ښاروالۍ او د FGA موسسې په همکارۍ د پسرلي موسم په را رسېدو سره د پکتیکا ولایت د پوهنتون په انګړ کې د ۳۰۰۰ (ناجو) نیالګیو په کېنولو سره پیل شو.

د نیالګیو کېنولو یاد کمپاین (د نیالګیو په کېنولوسره د چاپېریال ساتنه وکڔئ) تر شعار لاندې د یو لړ شانداره مراسمو په ترڅ کې پیل شو چې پکې د پکتیکا والي الحاج مولوي عبدالخالق عابد او د مختلفو ولایتي ریاستونو رئیسانو سربیره ځوانانو، محصلینو،  عامو خلکو او د  مختلفو موسسو  استازو برخه اخیستې وه.

ښاغلي والي صاحب په خپلو خبرو کې په پکتیکا والو غږ وکړ چې نه تنها چې نیالګي کېنوئ بلکې څارنه او پالنه يې هم د هر وګړي دنده او مسؤلیت دی، همداشان د چاپېریال ساتنې رئیس مولوي محمد سجاد وقاص په خپله عالمانه وینا کې خلکو ته ډاډ ورکړ چې له دې وروسته به پکتیکا ولایت ته له نورو ولایتونو څخه نیالګي نه را وړل کېږي بلکې دلته پکتیکا کې به په تحقیقاتي فارم کې هر نوعه نیالګي روزل کېږي او بیا به ددې ولایت خلکو ته په وړیا توګه توزیع کېږي.

 د دې کمپاین په لړ کې به په پکتیکا ولایت د سرسبزه کولو او سالم چاپیریال د رامنځته کیدو په موخه  زرګونه نیالګي کېنول شي او یاده لړۍ به د دې ولایت مختلفو ولسوالیو ته هم وغځیږي.

د یادولو وړ ده چې سږ کال د پکتیکا ولایت چاپېریال ساتنې ریاست  سره ۵۰۰  نیالګي د ټیلو موسسې لخوا کومک شوی چې د پسرلي په اوږدو کې په مرکز ښرنه او ولسوالیو کې ددې ولایت د سمسورتیا په پار کېنول شي همدارنګه د پکتیکا ولایت د پوهنتون رئیس مولوي شبیر احمد عباس ډاډ څرګند کړ چې د یادو کینول شوو نیالګیوو به په سم ډول اوبه کول او ساتنه کوي.

Mar 18, 2025